کولت. آز ایختیساسجا هکیم اولان سولماز قریبئلین "دانیش" آدلی شئیرینی تقدیم ائدیر:

بیر آز منه "یالان" دانیش ،
اوریین‌دن یول سالمایان،
بیر عؤمور بویو اولمایان،
یالانلاردا هئی دولانان،
سئوگین‌دن دانیش.
دانیش!،ائله دانیش کی،
او سؤزلرده گئرچک گزه‌ن ،
گؤزلریم یاشلا دولماسین،
بیر آزجا تسل‌لی تاپ‌سین،
قوورولماسین..
لاپ، گئرچک خیال‌دا قورسون،
یالانین‌دان یورولماسین..

دانیش،!سوسما، دانیش..
قوردوغوم خیاللاری،
او کؤورک آرزولاری ،
قیرما دانیش...
اولوب کئچه‌نلردن،
وفاسیزلیق ائد‌نلردن،
بو گون‌دن، دونه‌ن‌دن،
ائله یالان‌چی
شهردن دانیش،

دانیش کی، سوسان گؤزلرین،
او داش ،یالان اوریینین،
یالانینی گؤسترمه‌سین،
دانیش،!سسین پرده اولسون،
قلبینین یالان سسینه.
دانیش ،وئردیین او ودلر
کؤلگه‌ن اولوب ،
گیزلی -گیزلی سورونمه‌سین،
دیدیم-دیدیم دیدیلمه‌سین
بیر آز منه یالان دانیش،
.... ....دانیش!.... خیالیم اؤلمه‌سین.
دانیش....