کولت. آذ بالاجالار اوچون زاهید خلیلین "قویروق" حکایه‌سینی تقدیم ائدیر:

بیری وار ایدی، بیری یوخ ایدی، بیر قویروق وار ایدی. بو قویروق فیکیرلشدی کی، گؤره‌سه‌ن نه قویروغو اولسون. آخیردا بئله قرارا گلدی کی، آیی قویروغو اولسا یاخشیدی. قویروق گئدیب آیینین بدنینه یاپیشدی و باشلادی بو دونیادا عؤمور سورمه‌یه. او مئشه‌ده‌کی حیوانلارین قویروغونا باخیب گولوردو:

-بیر بونلارا باخین، سیز الله! بونلار دا اؤزلرینی قویروق یئرینه قویور. سیز بیر او تولکو قویروغونا فیکیر وئرین، ائله بیل اوت توپاسیدی. هله گؤر تولکونون آیاقلارینی نئجه تومارلاییر. ائله بیل او یؤنده‌مسیز آیاقلاری تومارلاماسا، داها نه بیلیم، نه اولار. هله او قویون قویروغونا فیکیر وئرین. نئجه ده یایخانیر. بیر نازلانیر کی، گل گؤره‌سه‌ن. آتین قویروغونا ایسه زحمت چکیب باخماغینیزا دیمز. اونون عوضینه ائله سوپورگه ده باغلاماق اولاردی.
بیردن بو قویروق گؤردو کی، یوللا بیر اینسان گئدیر. باخدی قویروغو-زادی یوخدو.
-من بو اینسانلارا لاپ معطل قالمیشام — دئدی،-هئچ قویروقسوز دا یاشاماق اولار؟

قویروق گؤردو کی، اینسانین دالینجا بیر ایت قاچیر. آیدین‌دی کی، اونو توتماق ایستییر. ایت اینسانا چاتهاچات‌دا او توللانیب آغاجا چیخ‌دی. ایتین آغزی اینسانین شالوارین‌دان آنجاق بیر پارچا قوپارا بیل‌دی.

-قویروغو اولسایدی یقین کی، توتموشدو-دئیه قویروق فیکیرلشدی. و بئله قرارا گل‌دی کی، اینسانا قویروق قطیعا لازیم دئییل. بیر آزدان قویروغون باشینا بیر ایش گلدی. آخی آیی چؤمبلتمه اوتورماغی سئویردی. ائله اوتوران کیمی، قویروق دا اونون بده‌نین‌دن دوشوب قاچدی.

چوخ‌دان‌دیر کی، همین قویروق‌دان بیر خبر یوخ‌دور.