کولت. آذ کمینه هویل قیزینین "مزار داشی" آدلی شعیرینی تقدیم ائدیر:

داش دا دانیشارمیش بیلممیشه‌م من،
داشلارلا دانیشماق نئجه آغیرمیش.
ایللردیر بیر داشلا دانیشیرام من،
سن دئمه، داشین دا دیلی وارییمیش.

منی هزین-هزین دینلییر او داش،
داشلار دا اینسانا اولورموش سیرداش.
گؤزومون یاشییلا یویورام داشی،
او داش اورییمین سینمیش پارچاسی.

دردلی اینسانلارین پناه یئری‌دیر،
آتاسیز قیزلارین گومان یئری‌دیر.
تانرینین وئردیی عؤمور بیته‌ن‌ده،
هامینین سون ائوی، سون منزی‌لی‌دیر.

بو بیر دوغمالیق‌دی، بیر یاخین‌لیق‌دی،
دردینی داشلارا دئیه بیلیرسن.
شکیل‌دن بوی‌لانان مسوم باخیشلا
سواللارا جاواب آلا بیلمیرسن.

بو بیر معجزه‌دیر، بیلمه‌م کی ندیر؟
اللرین اسسه ده، تیتره‌سه‌ن ده سن،
بوز کیمی مزارا سؤیکه‌نه‌ن زامان،
اونون آتشیله ایسینیر بده‌ن.

نه سؤزوم، صحبتیم اولورسا اولسون،
او داش منیم ایله دانیشیر هر آن.
اؤزومو اونونلا خوشبخت سانیرام،
سانکی داشلاشیرام من داش اولورام.

داشلارین اؤز دردی، اؤز دیلی واردیر،
اونلارین بامباشقا دونیاسی واردیر.
داشلاشمیش اینسان‌لیق مزارلیغین‌دا،
هر داشین آلتین‌دا بیر اورک واردیر.

منی هزین-هزین دینلییر او داش،
داشلار دا اینسانا اولورموش سیرداش.