کولت. آذ فیکرت قوجانین "گیزلی سئوگی" آدلی شعرینی پوئزیاسئور اوخوجولارا تقدیم ائدیر:

سئوگیمدن قاچمیشام اوزاق شهره،
بوردادا حسرتین گلیب، دایانیب.
عطرین سپه‌له‌نیب بۆتون گۆللره،
گؤزونون رنگینه گؤیلر بویانیب.

سنینچون دنیادا بلکه یوخام من،
سنی سئودیییمی هئچ بیلمه‌ییرسن.
گۆندوز خیالیمدان، گئجه یوخومدان،
بیر آندا، بیر آندا چکیلمه‌ییرسن.

اۆره‌ییم، داشا دؤن، بو سرّی ساخلا
بو سئوگی، بو بلا هاردان ائنیب‌دیر؟!
بیزیمکیلر طالعیمیز ائوله-اوشاقلا
هره‌سی بیر یانا زنجیرله‌نیبدیر.

اؤلونجه عشقین‌له اولاجاغام من،
من سنین روحوندا، قانیندا وارام.
اۆستونو کۆل اؤرتموش بیر اوجاغام من
بالاجا بیر مئه‌دن قاینایار یارام.