قاپالی

قاپی میزی قاپایب ایچری کئچدی. قاپی نین ایشگیلینی سالیب بیر باشا قوناق اوداسینا دوندو. آغزینا ایت باشی آلمیشدی. بیرینجی آنامی سویدو، بویوک باجیما آغزینا گلنی دئدی. آخشام اولدوغوندان هامیمیز ائوده ایدیک، کیچیک باجیمین قولاغینی بوروب موبلون اوزرینده یاییلدی.

بویوک قارداشیمی اولان (اوغلان )آدیلا چاغیریب یانینا چکدی.

آتا بویورون داداشیم سویله دیکده، آتام دیشی نین دیبیندن چیخانی داداشیما سایاندان سونرا (منه قحبه اداسی چیخارتما )،بو ائوده نه باش وئریبدیسه منه دانیش یوخسا وئررم دریوه سامان تپرلر، اوزون بیلیرسن دا دئدی.

من توته یین دیلینی چکیب بیربوجاغا سیخیلیب گیزلی -گیزلی باخیردیم. آتام یئنی دن سوزه باشلادی : گئده به سنن دئیلم نیه دیلدن لال اولوبسان؟ اوغرشین بیری اوغرش. بویوک قارداشیمین بوینون دا کی دامارلارینا آدام باخاندا، آدامین جانینا قورخو اوتوروردو، اوزومده دئیردیم:

ایندی داداشیمین بویون دامارلاری پارتلایاجاق. هاندان -گئج دن آنام اوزونو اورتایا آتیب دانیشدی :سنه یئنه نه اولوب؟ ائشیک ده تریاک -زاد چکمه میسنمی؟ سئوال ائتدیکده آتام اسکی پهلوانلار سایاغی مجمه یی جیرماغا باشلادی، ائله باغیریردی ائوده پنجره شوشه لریمیز تیتره ییردی.

بویوک باجیمین یاشماغینی، کیچیک باجیمین مانتو سونو، آنامین کوچه باشیندا اولان باققال لا سلام -علیکینی، قارداشیمین بونلارا قایغی سیز مناسبتینی سانایب بیردن گوزو منه ساتاشدیقدا :اوبالاجا گئده یه باخ نوار ییغیر -فیلم چکیر دئیب اوستومه باغیراندا، بویوک قارداشیم قولوندان توتوب :آرا وئر بلکه بیزیم ده دئدیک لریمیز اولدو آتامی دایاندیردی.

الله شیطانا لعنت ائله سین آتام دئیب سوسدو. آتا بوراخ نه شیطان نه لعنت هامینی قاپالی ساخلایب سونرادان دا اوز ونه برائت قازانیرسان. قارداشیم دئدی گئده کوفر دانیشما، چورک آتلی اولار سن پیادا، اللها خوش گئتمز، من سیزه بئله چورک یئدیترمه میشم.

هاردان بیلک؟ هه بیزدن خبرسیز نه اویونلاردان چیخیرسان، بیزه چاتاندا قانیمیزی شوشه یه توتوب اعتراف آلیرسان. به یم بوائو هامی میزا عاید دئیل، بونو باشا دوشملی سن سن بیزیم الله قویسا آتامیزسان آخی (چون دوست دشمن است شکایت کجا برم )جریانی اولوب بیزیم ائوده. باشیمیزا اویون قالماییر آچمایاسان.

(پدر سالار )سریالی یادداشلاریمیزدا جانلانیر، ائوده (حکومت نظامی )اعلان ائتمیسن. سببینی تکجه من یوخ هامی میز بیلمه لیک. آنام الیندن جانا گلیب، نورمادا اولمایان داورانیشلاری نین اوجوندان خدیجه باجیما گوره کیمسه قاپیمیزی چالماییر،هامی منه حاجی موزالانین اوغلو دئیر، یازیق اوشاقلار سیزی گوردوکده سیچان دلی نین ساتینی آلیرلار، آتالار سوزودور :بالیق باشدان قوخویار. ...بویوک قارداشیم چوخ دانیشدی یادیمدا قالانی بونلار ایدی.

دوزونو دئسم شالواری یاشاتمیشدیم، ،آنامی چاغیریب قولاغینا پیچیلدادیقدا الینی ساچلاریما چکیب حیطه آپاردی. اوست-باشمی یویوب ایچری گلدیکده آتامین کوپو بیرآز آلینمیشدی، قارداشیم اوز اوتاغیندا سیگارتینی آلیشدیریب چوبوق آلتینا قوناق گئدیردی.

لا اله ال الله -لا اله ال الله، آتام اوزونده دئینیردی. یئنه دیلیم دینج دورمادی، آتا هامی بیلیردا الله تک دیر.بیزیم سوزوموز قاپانماقدا دیر دئدیم کئچ جهنم اول، سنه سود وئرن ایت نن یاتسین.

ائله من نئچه ایل لردیر ایت نن یاتیرام آنام سویله دی.

حیط قاپیسینی چیرپیب آخشام نامازینا گئدیردی آتام...