کولت. آذ ۵ مای گونون‌ده دونیایا گؤز آچان احمد جوادین خاطره‌سینی یاد ائد‌رک، اونون حیات یولداشی شوکرییه خانیما حصر ائتدیی شعیری سیزلره تقدیم ائدیر:

بیر گول‌سه‌ن، درمیشه‌م گنج‌لیک باغین‌دان،
بیر گولو، چیچیی درمره‌م سن‌سیز.
کام آلدیم اؤمرومون اوغلان چاغین‌دان،
بیر باغا، باغچایا گیرمره‌م سن‌سیز.

سؤیله یادین‌دامی چاکوا، باتومی؟
اوولادین کؤنلومو، چالدین روحومو!
کامانا دؤنموش‌دو قلبیمین سیمی،
هورینی، ملکی گؤرمره‌م سن‌سیز!

نه چوخ‌دور دونیادا قنیرسیز پری،
گؤزومه گؤرونمز داها هئچ بیری!
او قیزیل ساچلاری، ایپک تئللری
ال آتیب بیرینی هؤرمره‌م سن‌سیز.

من‌دن خوشبخت وارمی دونیادا، دئیین؟!
ائی تئل‌لی یاوروسو سولئیمان بیین!
بختیم ترلان ایمیش: یئیین‌دن یئیین!
هئچ کسه بو بختی وئرمره‌م سن‌سیز!

سنینله گزره‌م ائلده‌ن-ائله من،
باتارام، چیخارام سئل‌دن-سئله من.
دوش‌سه‌م ده آغیزا، دیل‌دن-دیله من،
یاشایا بیلمره‌م بیر کره‌م سن‌سیز!

سوناتک گؤللرده اوزسه‌ن ده من‌سیز،
قوش اولوب گؤیلرده سوزسه‌ن ده من‌سیز،
سن اصلی قال‌سان دا، دؤزسه‌ن ده من‌سیز،
آلیشیب یانارام من کره‌م سن‌سیز!

شوکرییه تالئییم، شوکور خودایا!
گؤردویوم دوغرومو، یوخ‌سا پک رؤیا؟!
دولوب اوراییمه بو دادلی خولیا،
شیرین گونلری‌می سورمرام سن‌سیز!

اوت، بو سئودانین صفاسی چوخ‌دور،
سئوداسیز حیاتین معناسی یوخ‌دور!
گؤزلرین ییلدیزدیر، کیپریین اوخدور،
اورک قوبار اولار - جان وئره‌م سن‌سیز...

شعیریمین اؤزوسه‌ن، سؤزو - آهنگی!
اوزون‌ده برق وورور گوللرین رنگی!
خیالین، جمالین گؤزل چلنگی!
ایلهام یئتیم قالار، عقل کم سن‌سیز!...