کولت. آز م. کاوسینین "ایت" آدلی حکایه‌سینی تقدیم ائدیر:
منیم آتام چوخ وارلی کیشی اولدوغونا گؤره، بیز چوخ ناز- نعمتده ایچینده بؤیویوب یاشیردیق. زمانه بیزیم دؤنرگه‌میزی چؤوردو، آتام بیر بؤیوک آل‌وئرده چوخلو زیان قویدو؛ هر نمنه‌میز وار ایدی ساتدی، چوخ یوخسول‌لادوق. داها اؤز شهربمیز خسروشاه‌دا قالماق اولمادی. منیم بیر آز پولوم وار ایدی، حیات یولداشیمی دا گؤتوروب، تهرانا کؤچدوک، بیر بالاجا اوتاق توتوب آزجا ائو وسایلیمیزی اورا ییغدیق.

آه.......کاسیبلیق، سن نه یامان دردیمیشسن !!!!!!

هانسی ایشی تاپیردیم ببنمیردیم، بئله فیکیرلشیردیم کی، بوتون خسروشاه اهلی منی گؤرولر! اؤز اؤزومه اوتانیردیم، آخیرده تانیش‌لاریم منه بیر ایش تاپدیلار.

شهردن بیر آز اؤزاق بیر تاجیرین باغیندا ایشله‌مک.

بو ایش منه چوخ یاخشی ایدی، هم گؤزدن ایراق ایدیم، هم ده ائله ایش ایدیرکی، اوشاقلیقدان عادت ائتمیشدیم .
هر گون حیات یولداشیم، دسمالیما بیر آز چؤرک، بیر از پنیر یا آیری یاوانلیق قویوب، منی یولا سالیردی .
باغ صاحبی نئچه کرخانا، نئچه پاساژ ، ها بئله تجارت خانایا صاحب ایدی. او هر گون باهالی ماشینی‌ ایله باغا گلیب باش چکیب، ایتینه خؤرک وئرندن سونرا ایشینه قایداردی، من ده باغوانلیقدا چالیشاردیم .

اربابین ایتینین گیرده بورونو، سئومه‌لی آبی گؤزلری، چوخ آلچاق قیچ‌لاری، پامبوق کیمی آغ توک‌لری وار ایدی.
بو باغ جنت کیمی ایدی هر جوره میوه آغاجی وار ایدی. باغین چوخلو گول‌لرینی هلند اؤلکه‌سیندن گتیرمیشدیلر ، منیم حقیم یوخ ایدی اونون ایتینه یاخینلاشیب خورک وئریم.

چوخلو جمعه گونلری ارباب اؤز عایله‌سی و قوناق‌لاریله بیرلیکده گلیب، دؤشویوب، دانیشیب گولردیلر.
اربابین خانیمیله قیزلاری منیم قاباغیمدا پالتارلارینی سویونوب، گؤله دوشوب اؤزر دیلر .
ناهار وقتی اولاندا، سفره آچیلیب، جور به جور خورک‌لر و ایچگی‌لر دوزولوب هامی کئف ایله یئییب ایچردیلر .
منیم گئچمیشیم یادیما دوشوب، کدرلنردیم؛ یادیما سالاردیم بیز ده اؤز آتا- آنام و عایله‌م ایله حیطمیزده حووضون قیراغیندا فرش سالیب، اوتوروب یئییب- ایچیب، گولوب هیج بیر زاتدان خبریمیز اولمازدی .

من ایندی باشا دوشوردوم کی، بیزیم یوخسول همسایالاریمیز بیزیم گولماق سسیمیزی و خورک‌لریمیزین ایی‌سینی چکنده نه‌لر چکیردیلر.
نئچه ای بو جور گئچندن صونرا بیر گون ارباب منی چاغریب دئدی:

- من آل‌وئر اوچون آیری اؤلکه‌یه گئتمه‌لی‌یم. بونو بیلیرم کی، بو مسافرتیم بیر ای چکه‌جک. سن گرک بو بیر آیدا هم باغا هم ده منیم ایتیمه یاخشی یئتیشه‌سن. خیاوانین آغزیندا کبابچی‌یه تاپیشیرمیشام هر گون بیر شیش ات کابابی ایتین ناهارینا، بیر شیش ده جوجه کبابی شامینا حاضیرلاسین. سن گرک هر گون اونلاری آلیب، منیم ایتیمه یئدیرده‌سن.
ایکی اوچ آیری ایش ده تاپشیریب، ماشنینی مینیب گئتدی.

ایندی من قالدیم، باغ ایله، ایت.

من صاباحیسی گون نهار چاغی کبابچی‌نین توکانینا گئدیب، کباب‌لاری آلیب، بیر قابا قویوب باغا قاییتدیم. باغدا قابین قاپاغینی آچاندا هر یانی کباب ائییسی بورودو. ات کبابی‌نین اَنی بیر قاریج اولاردی. داها گیجلمیشدیم، بیلمیردیم نئیله‌ییم. اؤز- اؤزومه دئییردیم ایشه باخ منیم چوخ وطنداشلاریم قورو چؤره‌یه حسرت قالیب، اوشاق‌لاری درس اوخویا بیلمیر، اما بو ایت شام ناهارینا کباب یئییر.
احساس ائدیردیم کی اربابا، اونون عزتینه قارشی اوره‌ییمده بیر آجیق یارانیب.

ایتین خوره‌یی ایله اؤز خوره‌ییمی توتوشدوروب، اؤز - اؤزومه آرزو ائله‌دیم کاش من ده بو مملکتده بئله بیر ایت اولایدیم . اؤز - اؤزومه قرارلاشدیم خورک‌لری دیییشم . اؤز خوره‌ییمی ایته وئریب، اونونکونو دا اؤزوم و حیات یولاشیم یئسین ، بو ایشی ده گؤردوم.
اؤز خوره‌ییمی ایتین قاباغینا آتدیم ، ایت منیم خوره‌ییمی اییله‌ییب، یئمه‌دی. من ایکی گون بو ایشه دوام وئردیم،
ایتین ات کبابینی اؤزوم یئدیم، جوجه کبابی دا حیات یولداشیما آپاردیم.

ایکی گوندن صونرا ایتی بوش حووضون ایچینه سالیب یئنه اؤز خوره‌ییمی قاباغینا تؤکدوم. ایت نئچه گون آج قالاندان صونرا منیم خوره‌ییمی یئماغا باشلادی!

بو ایش بیر آیاجان تیکرار اولدو.
من یاخشی کوکه‌لمیشدیم، آنجاق ایت چؤپه دونموشدو!
ارباب سفر دن قاییتجاق، تله‌سیک ایتین یانینا گلیب، اونو گؤروب، منی سسله‌دی.
- منیم ایتیم‌ ایله نئیله‌میسن؟ بو نیه بیر دری بیر سوموک اولوب؟
منیم جوابیم اونو راضیلا شدیردی:

- قوربان سن گئدندن یازیق بو ایت آغزینی هیچ بیر زادا ویرماییب! ائله سنین غصه‌وی یئییب.
ارباب ایتی قوجاقلاییب اؤپوردو. ایت قویروغونو بولایییب، اربابا سونجوقلویوردو.

اما من او اوشاق‌لارارین قئیدینده ایدیم کی، آتا- آنالاری اولمایاراق کوچه - خیاوان‌لاردا قاردون ایچینده یاتیردیلار.