گلین

قیزیم گل اوتور سنین پیرتلاشیق ساچلاریوی داراییم، باخ ساچ‌لاریوین هامیسی بیربیرینه یاپیشیب. کوچه‌ده اویناییرسان، ائوه گله‌نده یویوب ائله‌میرسن، تئی تورپاق اولور.

-آنا اوغلان‌لار تورپاق تؤکدو باشیما. نه ائله‌ییم؟

باشلاییرام داراماغا، حایاتیمین ان گؤزل لذتی قیزیمین ساچینی داراماقدیر. ساچ‌لاری اؤز ساچ‌لاریم تکی‌دیر، بویاسی، دوروشوغو دنیز تکی؛ پیرتلاشیق دالغالاری اولا اولا یئنه یوموشاق‌دیر. هاچان‌ کی ساچ‌لارینی داراماغا باشلاییرام اؤزومو خاطیرلاییرام. هاچان کی ساچ‌لارینی داراییرام نازلانیب یوخوسو توتور. آنام آمما ساچ‌لاریمی دارایاندا اوقده‌ر مؤحکم چکدردی آغلاردیم.
- آنا یاواش، ساچ‌لاریمی اوزدون.

- بسدی قیز، ساچ‌لاریوی ایکی هفته‌دن بیر داراییرسان.

باشیمین آغریسینی یاددان چیخارتماغا گلین بالامی گوتوروب اوینادیرام.

- بسدی قیز، یئکلیبسن، هله گلین بالا اوینادیرسان.
من سن یاشدا اولاندا اؤز ائویمده‌ ایدیم.

- مگر بورا منیم اؤز ائویم دئییل؟
اوره‌ییمده دئدیم بونو.

- یاخچی آنا، قویدوم قیراغا، باشیمی چکمه دای!

آتام قاپینی دؤیونجه آنام آچماغا گئتدی. من‌ ده فورصتی قنیمت بیلیب اوتاغا قاچدیم. آتام همشه حیرصلی ایدی، هئچ واخت منی اؤپمزدی، آناما دا فقط "چای گتیر" دئیه‌ردی.

منی چاغیردی بؤیرونه، "گل اوتور بوردا گؤروم." اوتاقدان چیخیب گیردیم بؤیرونه.

- قیزیم دای سن یئکلیبسن، آناندان اؤیرن قیز همشه سؤز ائشیدر آغاسیندان.

- آتا من همشه سیزدن سؤز ائشیدیرم.

- قیزیم آغاوا دا هر شئیده گؤز اوسته دئیه‌جکسن.

- گؤز اوسته.
آنام من آتامین بؤیروندن چکیلینجه ساچ‌لاریمی آلدی الینه. چکدی اؤزونه ساری. آتامین حیرسینی ده تؤکدو منه.

- آنا منیم‌ گلین بالالاریم هاردادی؟

- آتدیم گئتدی.

گؤزومون یاشینی اله‌یه اله‌یه گلین بالامی چیرکین لوت وضعیتده حیطدن تاپینجا قوجاغیما باسدیم.

آخشاماجان آغلار گؤزله اوبیری‌لرینی گزیب آختاردیم. آنام گلیب بؤیرومده اوتوردو. مؤحکم بیر شیلله گئیدیردی اوزومه.

- سن اونلاری نییه آتدون گئتدی؟ اونلاری چوخ سئویردیم.

- داهی گلین بالا سئومک واختین دئییل.
بیر گول‌لو لچک باشیما آتدی، برکدن باغلادی.

- آنا بو ندیر؟

- لچک‌دیر، اؤرتمه‌لی‌سن، اوغلان‌لار ساچ‌لاریوی گؤرمه‌مه‌لی‌دیر. فقط بیر کیشی سنون ساچلاریوی گؤره‌بیلر.

- آتامی دئییرسن؟

- یوخ تئزلیکده بیله‌‌جکسن.

آغ دون اینیمدن دوشور، آنام الی‌له ساخلاییب. اوزومو بزه‌ییب، اؤزونون قیرمیزی ماتیکینی ده دوداغیما، یاناغیما سورته‌له‌ییب.

گول دسته‌سینی وئردی الیمه. گولو الیمدن یئره آتیب گلین بالامدان برک برک یاپیشدیم. اؤز آتامین ائویندن آلاهی آتامین ائوینه گئده‌جکدیم!

قیزیمین قیشقیرتی سسی‌له اؤزومه گلدیم.

- آنا یاواش! توک‌لریمی چکدون.

- باغیشلا قیزیم حاواسیم یوخ ایدی.

قیزیم گلین‌لیک عکس‌لریمی دوزوب قاباغینا بیربیر باخیر.

- آنا، سن آتامی چوخ سئودییین اوچون اونا گئتدین؟

- هه، قیزیم آتاوی چوخ سئویردیم، اتام کیمی سئویردیم.