کولت. آز شاعر-یازی‌چی، پئدئقوق زاهید خلیلین "قایایا چئوریلمیش بالینا" آدلی حکایه‌سینی تقدیم ائدیر:

هه، من بو اهوالاتین اولینی هеکایه‌لریمین بیرین‌ده یازمیشام. یادین‌دادیرمی. مردکان چیمرلیین‌ده اوشاقلارلا زارافات ائتمک فیکرینه دوشه‌ن بالینا! سونرا همین بالینا اوشاقلاری قورخوتدوغو اوچون دنیزین لاپ ساحلین‌ده قایایا چئوریلیب. باخ، بو اهوالات ایسه بالینا قایایا چئوریله‌ن‌دن سونرا اولموش‌دور. بیر دفعه لپه‌لر ساحله هوجوم چکیب بالینانی یوخودان اویاتماق فیکرینه دوش‌دولر. اما بالینا هئچ کیرپیکلرینی ده قال‌دیرمادی. چونکی او، اوشاقلاری یئنی‌دن قورخوداجاغین‌دان احتیاط ائدیردی. لپه‌لر سؤزو بیر یئره قویوب بو نهنگین بده‌نینی دوغراماغا باشلادیلار. اونلار او قدر هوجوما کئچ‌دیلر کی، آخیردا بالینانی ه اقیقته‌ن بیر نئچه یئردن یارالادیلار. بیر لپه آ غ باشینی قورورلا یوخاری قالدیریب دئییردی:

-سن بیر بونا باخ! یاتماق‌دان دویمور. بیر ده آییلیب گؤره‌جک کی، داها هئچ نیی قالماییب.

-بیز اونو دوغراییب تؤکملیگیک،-دئیه هله ده هیرسی سویومایان ایری بیر لپه اؤزونو بالینایا چیرپ‌دی. چیمرلیک‌ده‌کی آداملار بو قایانین واختیله بالینا اولدوغونو بیلمدیکلرینه گؤره ائله گومان ائدیردیلر کی، لپه‌لر ساحل قایالارینا چیرپیلیب گئری قایی‌دیر، وس‌سالام.

اونلار هاردان بیلی‌دیلر کی، بالینا بو ساعت هیرسلنیب آیاغا دورماق‌دان اؤزونو گوجله ساخلاییر. آخی او شاقلار اونون بئلین‌ده اؤزلرینی گونه وئریرلر. بالینا بیر بالاجا ترپه‌ن‌سه اونلاری قورخودا بیلر. عقل‌سیز لپه‌لر ایسه بونا قتییه‌ن اهمیات وئرمیر، گئجه-گوندوز اونون بده‌نینی یارالاماق اوچون اؤزلرینی وار گوجلریله اونا چیرپیرلار. کولک‌لی هاوالاردا ایشلر لاپ کورلانیر. لپه‌لر دالغایا چئوریلیر. بو زامان دنیز ساحلله البیاخا اولور. دالغالار ایسه بالینادان هاییفلارینی آلماق اوچون شاهه قالخیر، آز قالا اونو قوجاقلارینا آلیب دنیزه آپارماق ایستییرلر. بونا دا بالینا دئیره‌م. ساحل‌دن آرالانماغی آغلینا بئله گتیرمیر.

بیر اؤزونوز دوشونون. سحر اوشاقلار گلیب گؤرسه‌لر کی، بالینا یئرین‌ده یوخ‌دور، اوندا نه اولار؟!