کولت. آز نوسرئت کسمنلینین "من سنی اونودا بیلمره‌م آخی" شئیرینی تقدیم ائدیر:

من سنی اونودا بیلمیرم آخی،
اونوت‌سام، نلری اونودام گرک!
گؤیلره باخمیشیق آیلی گئجه‌ده،
اونوت‌سام، گؤیلری اونودام گرک!

دنیزی اونودوم، یا دالغالاری؟
خاطره‌ن یادیم‌دان چیخای‌دی باری...
پاییزدا خزانی، قیش‌داسا قاری،
باهاردا گوللری اونودام گرک!

دئ، نئجه اونودوم من سنی، نئجه؟
سئوگی دورنا دئییل، پاییزدا کؤچه،
یوخوما گلیرسن منیم هر گئجه،
آیلاری، ایللری اونودام گرک!

سنین خیالین‌دیر هسرتله باخان،
آدین‌دیر هر ساعت قارشیما چیخان،
قاریشیب شکلینه گؤزوم‌دن آخان
یاغیشی، سئللری اونودام گرک!

سینه‌م‌ده پئشیمان اورییم قال‌دی،
اوچدون، اللریم‌ده للیین قال‌دی،
نلری ایتیریب، باخ نییم قال‌دی،
نلری، نلری اونودام گرک...