کولت. آذ گونئی آذربایجانین خودآفرین بؤلگه‌سینین ایسکان‌لی کندین‌دن اولان شاعر علی جاوادپورون شعیرلرینی تقدیم ائدیر.

۱۹۷۳-جو ایلده آنادان اولوب. ۱۹۹۷-جی ایلده تبریز شهرین‌ده فارس دیلی و ادبیاتی فاکولته‌سینی بیتیریب. ۲۰۰۷-جی ایلده تبریز اونیوئرسیتئتین‌ده «ناظیم حیکمت شعیرین‌ده و تفککورون‌ده آختاریشلار» آدلی دیپلوم ایشی مدافعه ائدیب. تبریز شهرین‌ده ادبیات معلمی‌دیر. اونون «بیه‌ن‌سه‌ن ده بودور بیه‌نمه‌سه‌ن ده»، «عصریمیزین یوخوسون‌دا»، «طبیعت و شئیر»، «منیم دلی یاشیدلاریم»، «سسین‌ده بیر حکایه وار» شعیر کیتابلاری ایشیق اوزو گؤروب.

آخشام چاغی اؤل‌نین کؤلگه‌سی مزارا سیغماز

ایچینین قاران‌لیغی‌دیر بلک ده،
یانینا دوشوب سورونه‌ن کؤلگه،
جانینا ایلیشیب سورونه‌ن کؤلگه!
سن یئریرسه‌ن گونشه دوغرو
او کوریینجه سورونر
گونش سولون‌دان چیخار
او ساغین‌دا گؤرونر
گونش ساغین‌دان چیخار
او سولون‌دا گؤرونر
هارا گئتمک ایسته‌سه‌ن
او یولون‌دا گؤرونر.

علی یازان‌دان اوزولمز.

اؤزونو آپاریب چیخارارسان
گونون گونورتاسینا
گونش باشین‌دان شاخار
او یئنه ده
آیاغینین آلتینا سیخیلار.

قران‌لیقلا ایشیغین آراسین‌دا قالارسان
بیر آز ایشیقلانارسان بیر آزدا قارالارسان.
بیر آز دا قارالارسان دامارین‌دا قانین کیمی.
بیر آز دا قارالارسان عصرین زامانین کیمی.
ایچینی آجیغین داریشیب یئیر
اولرسه‌ن کی،
اینتیهار ائدرسه‌ن کی،
پوزولسون ایشیقلا قارانلیغین سینیری
آنجاق، کؤلگه‌نی سن‌دن اؤنجه
باس‌دیرماق ایسته‌یه‌نلر،
سنه گوجلری دوشر
سنی باسدیرارلار
کؤلگه‌نه گوجلری دوشمز.

آخشام چاغی اؤل‌نین
کؤلگه‌سی مزارا سیغماز،
کؤلگه‌سی باسدیریلماز!
سن تورپاغا گؤمولرسه‌ن،
کؤلگه‌ن یئر اوزون‌ده قالار.
گونشله اوز-اوزه یاشار
کؤلگه‌لره قوشولار، قاران‌لیق آشیب-داشار.
سن اؤلوب گئدرسه‌ن
دونیادا قران‌لیق یاشار، ایشیق یاشار
دونیا اؤنجه قارانلیقلاشار، سونرا ایشیقلاشار!..

قوش اوریی

رامیز رؤوشه‌نه

درددی، ندی؟
بو تیکه نئجه تیکه‌دی؟!
اوددون بوغازین‌دان کئچمه‌دی
توپوردون یئره دوشمه‌دی!

بو درد
نئجه درددی گؤره‌ن؟!
ییه‌سی سرخوش‌دو بئله!
او آغاج یوخودا نه گؤروب؟
یارپاقلارین وئریر یئله!

ائشیک‌ده هاوا سازاق‌دی، قیش‌دی
توپورسه‌ن گؤی‌ده دونار،
گوندوز گؤردویون قوشون،
قانادی سینمیش‌دی
اونون گئجه‌سی نئجه کئچ‌دی گؤره‌ن؟
قوش اوریی نئجه دؤزدو
قیشا، داشا؟!

ائئئه... سسینه سویوق دیمیش دونیا
سسین‌ده تتیک چکیلمیش دونیا!
سن ده، دردی درده سالماغا اومود وار بلکه ده،
یاشاماغا اومید وار بلکه ده.

یئرین اوریی گؤی‌ده یانیر.
یئرله، گؤیون آراسی سازدی هله،
بیر-بیرینین باشینا دولانیر.

بئله گئت‌سه بیلمک اولماز –
بو گئجه‌ده سحر اولدو بلکه
یئنه ده یوخودان دوردوق،
یئنه ده گؤزوموزو سیلدیک،
یئنه ده آلداندیق،
یاشادیق بلکه!...