باخ گؤزتچی بونا دئیره‌م: قوللارینی یانا آچیب دوز بوستانین اورتاسین‌دا دایانیب. بیر قوشون هونری وارسا یاخینلاش‌سین. قوروق‌چو ائله بیر سس چیخارار کی، قوشون باغری یاریلار: جیرینق، زارانق، دراتاخ!

هردن گؤزالتی یئتیشمیش چیلکلره باخیر، اؤز-اؤزونه فیکیرلشیردی: یقین بال کیمیدی. اما من اوندان بیرینی ده قوپارمارام. حرام شئی نییمه گرک‌دی. هه، قارداش، هئچ کسین مالینا ایری گؤزله باخمارام. هله سیز بوستانین اوستون‌ده اوچان بوز سرچه‌لره باخین، اوغورلوق ائتمک ایستییرلر، حرامزادالار. عیبی یوخ، من سیزه گؤسترره‌م. جیرینق، زارانق، درراخ!".

گؤزتچی پره‌ن-پره‌ن اولموش قوشلارین آرخاسینجا باخیب ائله بیر شاققاناق چک‌دی کی، بوستانین بوز کؤپیی حرصله هوروب قویروغونو قاپماغاباشلادی. چیلکلر بالاجا، قارامتیل دیشلرینی گؤستریب دئییردیلر:

-بیزی یئمک اولار! نیه گؤزلرینی برلدیرسن، یئسه‌نه؟! قارووول‌چو آغزینین سویونو گوجله ساخلاییب دئییردی:

-لعنت شیطانا. یوخ، من سیزی یئیه بیلمره‌م. سحر باغ صاحبینه نه جواب وئرره‌م. اوراسینی دا دئییم کی، بو عدالت‌لی قارووولچونون اوریی چوخ تمیز ایدی و گؤرونور ائله بونا گؤره ده اؤزون‌دن دئمیی یامان خوشلاییردی. ان چوخ سئودیی مشغه‌له بیر پلنگی اؤلدورمه‌سی حاقین‌دا روایتی دانیشماسی ایدی. بیر دفعه هاردان‌سا چوبان‌آلدادان قوشو اوچوب گلدی. چوبانال‌دادان چیلک یئمک ایستییردی. او دوز قارووولچونون قارشی‌سینا قونوب دئدی:

-قارداش، او پلنگی نئجه اؤلدوردویونو یاخشی-یاخشی دانیش.

قارووول‌چو شؤوقله دئدی:

-هه، بیر ده گؤردوم کی، زولاق‌لی، خاللی پلنگ گلیر. بیغلاری دا کی، قای‌داسین‌دا. دیشلرینی یادا سالان‌دا آدامین اوریی یانلیر. دوزدو، پلنگ چوخ بؤیوک ایدی. اما نه قدر بؤیوک اولسا دا منیم دیزیم‌دن آنجاق اولاردی. پلنگ بوستانین اورتاسینا چاتان‌دا من بیر نره چکدیم: درراخت! اونو گؤردوم کی، گومب بیر شئی پارتلادی: سن دئمه بو پلنگین اوریی ایمیش.

سحری اونو سورویوب آپاردیلار. باغ صاحبی باخ بونو منه اوندا باغیشلادی. چوبان آلدادان قارووولچونون صحبتینه قولاق آسا-آسا چیلک کوللارینی دنلییردی. او، یئتیشمیش مئیوه‌لردن یئییب جه-جه‌له اوخوماغا باشلادی. گؤزت‌چی غضبله قیشقیردی: جیرینق، زارانق، درراخت! تئز اول بوستان‌دان چیخ. باشی‌می صحبته قاتیب گؤر نه یئییر، قارین‌قولو. ائه، چوبانال‌دادان اونون سؤزونه هئچ اهمیت ده وئرمه‌دی. قیرمیزی چیلکله قارنینی دولدوران‌دان سونرا اوچوب دوز قارووولچونون ساری، اوزون بورنونا قون‌دو. باشقا قوشلار بو احوالاتی گؤروب اورکله‌ن‌دیلر. بیر آندا بوستانا داراشدیلار. قوروق‌چو نئجه حرسله‌ندیسه قیریلیب یئره دوش‌دو، اوستونون زینقیروولاری هره‌سی بیر یانا داغیل‌دی. دئییرلر کی، بوستان پوزولان‌دان سونرا اوشاقلار اونون قوللارینی آت کیمی مینیب چاپیرمیشلار. قوروق‌چو ایسه هله ده ایشه یارادیغی اوچون ائله اوولکی کیمی سئوینیرمیش.

اوراسینی دا دئییم کی، بو اهوالات دوغرودان دا اولوب. اؤزو ده بیلیرسینیز هارادا؟ کور چایی بویونجا اوزانیب گئدن بوستانلارین بیرین‌ده.