کولت. آز گونئی‌لی یازار اومید نججارینین "اونوتماق" آدلی شئیرینی تقدیم ائدیر:

گؤردویوم قورو آغاج دئییردی:

"قاییت‌سا بیر ده او گونلر،

اییلیب یئردن یارپاقلاری‌می ییغاردیم".

یوواسینی کولک آپاران قوش،

"مزاریم اوسته بیر آزجا گؤی اوزو سپین"، - دئییردی.

یانمیش کیبریت دنه‌لری دونیانین سورگون شاعرلری ایدی.

یان‌دیلار...

سؤن‌دولر...

آتیل‌دیلار اوزاقلارا.

قوتوسونا قاییتماق آرزوسو ایله جان وئردی شاعرلر.

گؤردویوم کؤرپونو سئل آپاردی، سئل...

اوستون‌دن بیر کیم‌سه کئچمه‌دن.

بالیقلار ایسه اونوت‌دولار هر شئیی

قورو آغاجلاری...

یوواسیز قوشلاری...

شاعرلری...

کؤرپولری اونوت‌دو بالیقلار.

بالیقلار بیر سحر یوخودان دورمادیلار.

بالیقلار اورک دؤیونتولرینی اونوت‌دولار.