کولت. آذ تانینمیش شاعر ائلوین باکیروغلونون سئچمه شذیرلرینی تقدیم ائدیر.

نئجه‌سه‌ن، شاعر؟
داریخیرسان‌می بوتون پوزالاردا؟
حیاتین شیرینلیینی آختاریرسان‌می
دامارینا وورولان سیستئمین
ایچین‌ده‌کی قلوکوزالاردا؟

آغ خالات‌لیلارین نئچه‌سی قشنگ‌دی اوردا؟
من بیرینی سئومیشدیم - دلی‌دی.
دوزدو قشنگ دئییل‌دی، اما چوخ گؤزلی‌دی...
گؤره‌سه‌ن بیزیم شئیرلرده صونعی‌لیک چوخ‌دو
یوخ‌سا اونلارین تبسسومون‌ده؟..

اول اوچا بیلیردین،
ایندی ایچه ده بیلمیرسن،
هاردا گیزلنه‌جک‌سه‌ن
اجلین اوو مؤوسومون‌ده؟
ساغ‌لیقلار سنی ساغلیغین‌دان ائل‌دیلرمی؟
سنه ده دئمیش‌دیلرمی تئز بؤیو،
بؤیویه‌ن کیمی اوشاقلیغین‌دان ائل‌دیلرمی؟

اوردا
او دؤرد دیوارین آراسین‌دا
یاخان‌دان یاپیشیرمی "بلکه‌لر"، "اما"لار؟
هر شئی جهنم
یازدیغین سونونجو شئیری
گؤستریرمی کاردیوقراممالار؟

یئری گلمیشکه‌ن،
سوروشورلارمی رنگین نیه سارال‌دی
او اوزو قارالار؟
دئییرسن‌می
"من ابدیت اوفوقون‌ده دوغان گونشه‌م،
گونش غروب ائد‌ن‌ده البته رنگی سارالار؟

***

تورکییه‌نین بیر جنوب شهرین‌ده ایچیم پاریس‌دی،
یوخلوغون درویش
درویش پاری‌سی پارتلادیر
بیلئت‌سیز ساعتلار یاشاییرام - کئچمه‌یه‌ن
کئچمه‌یه‌ن ساعتلاردا مؤوسوم گئجه‌دی
گئجه مؤوسومون‌ده سنی یاشاماق داغلاردا دؤیوش‌دو
بو دؤیوشلردن اوزو آغ چیخماق چتین
یئنی‌لمز باتالیون اولماق اولمور سن‌سیز
سن‌سیز قوللاریم بابک، دریم نسی‌می، روحوم قاچاق نبی‌دی
سن‌سیز آیری‌لیغی باغریما باسا بیلمیرم - اؤگئی آنادی
و آنامیز سئوگییه او اولماسین بو اولسون دئمک اولمور
یالنیز کیشی سؤزو وار، قادین سؤزو یوخ‌دو حیات‌دا
ایندی من سؤزوم‌دن دؤنمدییمه اوتانیرام
سن‌سه اوتانجین‌دان یوخ، اوزاق ساحللرده قیزمار گونش آلتین‌دا قیزاریرسان
تئلئفون‌چو قیز دا بیلیر احاطه دایره‌م‌ده اولمادیغینی
او قیزی تاپین دئمک اولمور تئلئفون‌چو قیزا

اومید شریک‌لی چؤرییمیزی‌دی، هامی‌سینی آپاردین
اؤزومو آتماغیم گلیر بئش مرتبه‌لی ائوین آلتینجی مرتبه‌سین‌دن
من بو تورکون شهرین‌ده فران‌سیز کیمییه‌م
دیلی‌می آنلایان، دردی‌می بیله‌ن یوخ
یعنی اونو باغیشلاماق اولارمی دئیه بیله‌جک بیر کیم‌سه‌م یوخ
بیر کیم‌سه‌م ده یوخ اؤلسه‌م باغیشلا دئمه‌یه
یعنی باش‌دان آیاغا بیر قالانین سیررییه‌م
یئددی اوغول ایستره‌م بو سیرری تاپا
سن‌ده ده چوخ گوناه گؤرموره‌م
بابامین باباسینین باباسین‌دان قالیب آرخادان وورولان زربه

بیلئت‌سیز ساعتلار یاشاییرام - کئچمه‌یه‌ن
کئچمه‌یه‌ن ساعتلاردا مؤوسوم گئجه‌دی
هر گئجه بیر آز بؤیویوره‌م
دئییرم اوشاقلیغین سون گئجه‌سی‌دی
هر سحر یئنی‌دن اوشاقلاشیرام بیر کیشینی اؤلدوروب
قتل گونودو هر سحر
سود دیشینین آغری‌سین‌دان دا بئتردی بو
اوتئل اوتاغی‌دی اوتاغیم
سن‌دن دونیانین ایکی ساعت گئری‌سین‌ده
تورکییه‌نین بیر جنوب شهرین‌ده ایچیم پاریس‌دی، یوخلوغون درویش
درویش پاری‌سی پارتلادیر…

***

آد‌م تنهالیغی‌دی من‌ده‌کی
داش آتیلان قورباغا گؤلودو اوتاغیم
یوخوسوزلوق ائویمیزین دامین‌دا
جوتلشه‌ن پیشیکلردن کئچیب
قونشوموزا کئشیک چکه‌ن ایتده‌ن یولوخوب
یورغان-دؤشک آراسین‌دا چابالایان گئجه بالیغییام
فیکرین تورونا دوشموشه‌م
اللها آند اولسون سؤز تاپمیرام آند ایچمه‌یه
بایقوش اؤمرودو من‌ده‌کی
دیری گؤزله گئجه‌نین اوزون‌لوغونو اؤلچمک‌دی پئشه‌م
سحره ساغ چیخماغی اؤیره‌نمک
اللها آند اولسون بو شئیر ده معناسیزدی
چونکی هیسس ائلدییم دئییل
یازا بیلدییم‌دی
بخت اویونودو من‌ده‌کی
اعدام گؤزله‌یه‌ن مهبوسام
بیر کیبریت قوتوسون‌دا قالمیش سونونجو چؤپه‌م
یاندیریلماق اوچون ساخلانیلمیشام
احتیاط اوچون یوخ...

***

منی سنه، سنی ده
منیمچون جوخ گؤره‌نلر.
آرامیزا گیره‌نلر -
آیری‌لیق ماسسونلاری...

گونو-گون‌دن آزالیر
چؤل‌ده آیاققابیلار.
پنجره‌لر، قاپیلار -
گؤزله‌مه سالونلاری...

اوشاقلارین یئمیی،
اوست-باشی، ایینلری.
آنامین چیینلری -
آغیر یوک واقونلاری...

تورپاغین اوزرین‌ده
سولئیمان‌دان ایز قالار.
زهمتکئش قاریشقالار -
یئرالتی قارسونلاری...

یاد بیر اؤلکه، یاد شهر،
آدام‌لی بوش کوچه‌لر.
عینی فرق‌لی گئجه‌لر -
هوزنون قارا تونلاری...

شاعرلر بو کدری
میلیون ایلدی اریتمیر.
نیه ایشیق‌لی بیتمیر
شئیرلرین سونلاری...

***

کوچه‌سینه کیم سو سپر
کوچه‌نی سوپوره‌ن قیزین؟
اوزون‌دن توز-تورپاق اؤپر
بختینه توپوره‌ن قیزین.

اونودوب بوتون عالمی
ائله اؤز ایشینی گؤرور.
اوتوروب دینجه‌له‌ن کیمی
قاشلاری دا یئر سوپورور.

سوپورگه‌نین اوستون‌ده‌کی
ساچاقلاری یولور بیر-بیر.
اؤیره‌نمک ایستییر سانکی
سئویر، سئومیر، سئویر، سئومیر…

***

علی‌می اوزموشه‌م یاغیش سسین‌دن،
داها گون ده چیخماز یاغیش‌دان سونرا.
کیرایه بیر ائوین پنجره‌سین‌دن
سنی سئومک اولمور بو یاش‌دان سونرا

سنی سئومک اولمور یاد بیر اؤلکه‌ده،
سنی سئومک اولمور طلبه کیمی.
علاوه بیر یوک‌سه‌ن هر گون بلکه ده
چیخدیغیم آلتینجی مرتبه کیمی.

ائله کی گؤزون‌دن بیر آز یاش آخیر،
ائو ییه‌سی ائوه گلنه‌جه‌ن‌دی.
هؤنکوره‌ن‌ده سسین باییرا چیخیر،
سنی سئومک اولمور، دیوار اینجه‌دی.

تنهالیق اوستومه ایت کیمی هورور،
من اولدوم-اولمادیم ائوده دولاشیر.
سنی سئومک اولمور، قونشولار گؤرور،
دئییرلر بو اوغلان کیمله دانیشیر.

اما سن، بیلیرم، ائله ایندی ده،
ایلین بو چاغین‌دا سئویرسن منی.
کیمین ماشینین‌دا، کیمین ائوین‌ده،
کیمین قوجاغین‌دا سئویرسن منی؟