یالقیز سینیق پنجره‌نین شوسه‌سینده،گونشین باتماق قیرمیزی‌لیغی گؤروکوردو. توز- تورپاقلی بولود سینیق دودکئش‌لرین اوستونده گؤزو قاماشدیریردی. آرانلیق وئران اولموش ائولرله یاتمیشدی. اوغلانجیق گؤزلرینی یومموشدو. لاپدان هاوانین قارانلیق اولماسینی حیس ائله‌دی. سانکی بیری گلیب ساکیتجه اؤنونده دورموشدو‌.

اؤز- اؤزونه: «ایندی گیره دوشدوم» دئدی. کیپریکلرینین آراسیندان اوغورلوق باخدی. اینینده نیمداش شالواری اولان ایکی اَیری- مویرو قیچ گؤردو. قیچلار او قدر جَرجَنک ایدی، آراسیندان اطراف گؤروکوردو. اور‌ک¬لنیب اوسته باخدی. یاشلی بیر کیشی ایدی. کیشی‌نین الینده پیچاق و سَله واریدی. اللری تورپاقلی ایدی.

– نیه بوردا یاتمیسان؟! کیشی سوروشدو.

یورگن گؤز آلتی کیشی‌نین قیچلاری‌نین آراسیندان باتان گونَشه باخدی.

– یاتمامیشام. دئدی، بوردا گودوکچو دایانمیشام.

کیشی باشینی ترپَدیب:

– اوندا بئله حتماً بو یئکه آغاجی دا بو سببه الینه آلمیسان؟

یورگن اورکلنیب، «هه» دئدی و آغاجی الینده سیخدی.

– یاخشی. دئیه بیلرسن نه‌یی گودورسن؟

اوغلان آغاجی لاپ بتردن الینده سیخدی.

– پول اوچون کشیک وئریرسن؟

کیشی سله‌سینی یئره قویدو. پیچاغی شالواریلا تمیزلدی.

– یوخ. اصلاً پولدان اؤترو دئییل. من باشقا زادا کشیک وئریرم.
– نه‌یه؟!

– بو بیر سرّ دیر. دئیه بیلمه‌رم.

– اولسون دئمه. من ده سنه بو سله‌ده نه اولدوغونو دئمییه‌جم.

یورگن اعتیناسیز، «اوهو! من او سبدده نه اولدوغونو بیلیرم. دُووشان خوره‌یی وار» دئدی.

کیشی تعجوب‌لو:

– آفرین! عجب هوشلو اوشاق‌سان، دئدی. نئچه یاشین وار؟

– دوققوز.

– آفرین! اوندا گرک بیله‌سن اوچ دنه دوققوز نئچه اولار، ائله دیر؟

– بو چوخ ساده دیر. ییرمییئددی.

– یاخشی. منیم دقیقاً ییرمییئددی دُووشانیم وار.

یورگنین آغزی تعجوبدن آچیلا قالدی:

– وااای… ییرمی یئدی؟!

– ایسته‌سن اونلاری گؤره بیلرسن. آما بعضیلری چوخ بالاجادیرلار.

یورگن تردیدله، «یوخ.من گرک بوردا کشیک دورام» دئدی.

– اوندا سن ائوه شام یئمه‌یه گئتمیرسنمی؟!

یورگن بیر داشی قالخیزدی. آلتیندا بیر پارا چؤرک و بیر حلب قوطو سو واریدی.
– پیپ ده چکیرسن؟

– یوخ هردن سیگار چکیرم. پیپ سئومه‌رم. حیف اولدو، دُووشانلاری گؤره بیلردین. بلکه بیرینی ده اؤزونه گؤتورردین. آما بوردان اوزاقلاشا بیلمزسن.

سله‌سینی گؤتوروب آیاغا قالخدی گئتسین.

یورگن عجله‌لی، «بیرینه دئمه¬سن من چؤل سیچانلارینا کشیک وئریرم» دئدی.

کیشی آرخاسینا دؤندو.

– چول سیچانلارینا؟!

-بلی اونلار اؤلولری یئییرلر. خُور‌کلری اؤلو اَتی‌دیر. اؤیرتمنیمیز دئییب. من گؤزله‌ییرم اونلار قارداشیمی یئمه‌سینلر. بو آلتدا باسدیریلیب‌.
سونرا چوپوقلا وئران اولموش دیواری گؤرستدی.

– بیر بُمب ائویمیزه دَیدی، زئرزمی¬نین چیراغی سؤندو، بیز قارداشیمی چوخ چاغیردیق، سس وئرمه‌دی. اونون یالنیز دؤرد یاشی واریدی. مندن دؤرد یاش کیچیک ایدی.

کیشی دئدی:
– اؤیرتمنیز دئمه‌ییب چول سیچانلاری دا گئجه‌لر یاتیرلار؟!

یورگن یورغون حالدا: «یوخ دئمه‌ییب» دئدی.

کیشی، «عجب!‌ اؤیرتمنیز بیلمیر سیچانلار دا گئجه‌لر یاتیرلار. گئت ائوینیزه راحات خیاللا یات. اونلار دا هاوا قارانلیقلاشاندا یاتیرلار. من گئدیرم دُووشانلارا غذا وئرم. هاوا لاپ قارانلیقلاشاندا گلرم. سنه ده بیر بالاجا دُووشان گتیره‌رم. ایستیرسنمی؟

– دوغروچو دوشان؟! آغ؟ بوز؟ آغ- قارا؟! اونلاردا گئجه‌لر یاتیرلار؟!

کیشی وئران دیوارین اوستوندن کئچیب جادده‌یه طرف دؤندو:

– بلی اونلاردا یاتیرلار. اؤیرتمنیز بونو بیلمیرسه پَسه- پوسه‌سینی ییغیشدیرسین. نه اؤیرتمنی دیر؟!
یورگن آیاغا قالخدی. بیردنه آق دُووشان ایسته‌ییرم دئدی.

کیشی اوازاقلاشارکن:

– من گرک ائوینیزه گلیب، سیزه دُووشان یوواسی دوزلتمگی اؤیره‌دم دئدی.

– سن گلنه جن منیم ده کشیکیم قورتارار. بیزیم تاختا جعبه‌میز ده وار. یورگن دئدی.

کیشی بونو ائشیتمه‌دی. او جرجنک قیچلاریلا گون باتانا ساری قاچیردی.

هر یئر گونون شوگه‌سیندن قیزارمیشدی.گونش کیشینین جرجنک قیچلارینین آراسیندان گؤروکوردو. الینده کی سَله اویان- بویانا یئللنیردی.دُووشانلارین غذاسی اوندایدی. اونلاری توز-تورپاق بوروموشدو.

چئویرن: سحرخیاوی