کولت. آذ حسین جاویدین "اویویور..." آدلی شعیرینی تقدیم ائدیر:

اسمه، دور! اسمه، ای نسیمی-باهار!
اویویور، یاری-عیشوه‌کار اویویور.
دالغالاندیقجا زولفی-زرین تار،
سارییور پنبه حوسنو آلتین نور.
او گؤزل چهره‌نین اسیری ایکن،
عجبا، قیسقانیرمیسان بندن؟!
اسمه، بیر دور! بیراق، بیراق اویوسون
نوباهارین شو نازنین قیزینی.
اؤتوشه‌ن قوشلار! ایشته سیز ده سوسون!
سوسون آرتیق! شو زؤهره ییلدیزینی
سئیر ائدین ایشتیاق و حسرت ایله،
بو گؤزل لوحه سونرا دوشمز اله.
بو چیچک‌لیک‌ده، سیز امین اولونوز،
بؤیله بیر گول یئتیشممیش اصلا.
کیم بیلیر، دوشسه جننته یولونوز،
بولونور بلکه بؤیله بیر سیما،
بولونور بلکه بؤیله بیر آفت!
او دا شایانی-شوبهه‌دیر، البت...
گونش! ای خیلقتین گؤزل گلینی!
اویویور ایشته نازلی همشیره‌ن!
سن ده دور! ساچما بیر ضیالرینی،
سن ده بیر آن ایچین چکیل، گیزله‌ن!
بیر آز ایله‌ن بولوت‌لو دونیاده،
مانع اولما بو تیفلی-نئوزاده.
بستری-نازی هپ چیچکلردیر،
اوخشایور ایشته گول یاناقلارینی.
یئشیل اوتلار اؤپر دقیقه‌ده بیر
پنبه، تومبول، لطیف آیاقلارینی.
آخیشیب ان کوچوک سولار خندان،
نیننی سؤیلر او شوخ ایچین هر آن.
اویویور... بیخبر شو ولولدار،
شو صفاسیز، وفاسیز عالم‌دن.
اویویور... باق نه خوش، گولر یوزو وار،
شاشیریر شوبهه‌سیز بو حالی گؤره‌ن.
شیم‌دی رؤیاده کیم بیلیر، بو ملک،
هانکی عالم‌ده ایلنیر گوله‌رک.
اویویور... پک سئویم‌لی، پک معصوم،
بیر چوجوق روحو وار شو فطرت‌ده.
هله راست گلممیش بو تالعی-شوم
بؤیله بیر نازنینه خیلقت‌ده.
حوسنی-مطلق ائنرسه یئر یوزونه،
قونار آنجاق بونون گولر اوزونه.
اویویور... اوف! ای بلالی کؤنول،
چیرپینیب دورما! سن ده سوس آرتیق،
وورما، سوس! ایشته سوسدو هم بولبول.
دور، حیاتیم دا گئتسه، دور آزاجیق،
اویویور چونکی آشینایی-خیال،
اویویور چونکی قایئیی-آمال...