Axar.az
یوخاری
9 اییول 2020


سیزسینیز عؤمرومون یئلکه‌نی، ایللر!- شعیر

آنا صحیفه ادبیات
12 Punto 14 Punto 16 Punto 18 Punto

کولت. آذ بختیار واهابزادنین "ایللر" آدلی شعیرینی تقدیم ائدیر:

بؤیومک عشقیله اوشاق‌لیق‌دا من
بویومو اؤلچردیم گون‌ده یوز کره
چوخ واخت گیلئیلنیب کیچیکلییم‌دن،
قیبته ایله باخاردیم من بؤیوکلره.
اؤزومو حکیمه، گاه معلمه،
گاه دا مهندیسه من بنزدیردیم.
آتامین هر کیچیک حرکتینی
بؤیوک بیر هوسله تقلید ائدردیم.
«اوزوم توکلنه‌جک، بس نه واخت؟» دئیه
اون دفعه باخاردیم گون‌ده گوزگویه
یاشی‌می دئمه‌یه من اوتانیردیم،
اؤزوم‌دن بؤیویو خوشبخت سانیردیم...
بؤیومک ایستردیم من گون‌ده بیر یاش،
ایستردیم تئز کئچ‌سین آیلار، فصیللر،
هفته‌لر اؤتدوکجه هئی یاواش-یاواش،
«نه یامان لنگ کئچیر» دئیردیم، ایللر...
ایللر لنگ کئچمه‌دی، هر آندا ایللر
مین اینسان عؤمرون‌دن کام آلدی کئچدی
بیر زامان گؤردوم کی، اوتوز یاشیم وار،
ایللر ساچلاریما دن سال‌دی کئچدی...
دییشیر اینسان‌دا محبت، هوس،
ایللر ده عؤموردن گئتمیر بوش یئره،
بو گون بؤیوکلره دئییل، ندن بس،
قیبتیله باخیرام من کیچیکلره.
باشیمیز ایشلره قاریشیر یامان
هئچ بیلمیریک آخشام نه زامان دوشور
یامیاشیل گؤردویون دوننکی یارپاق،
بیر ده گؤرورسه‌ن کی، بوداق‌دان دوشور.
ایللر چوخ سرعتله اؤتور دالبادال
بیر آندا داغلارین قاری سئل اولور،
گؤزوموزو یوموب-آچینجا درهال،
هفته‌لر آی اولور، آیلار ایل اولور.
مین گئدیش، مین گلیش اولور بیر آندا،
قووور بیر-بیرینی سانکی نسیللر.
من هر تزه ایلی قارشیلایان‌دا،
«نه یامان تئز کئچیر» دئییرم، ایللر...
دئیین، هارا بئله تلسیرسینیز؟
سیزسینیز عؤمرومون یئلکه‌نی، ایللر!
من سیزی قوواردیم اوشاقلیغیم‌دا،
ایندی قووورسونوز سیز منی، ایللر!...

تاریخ
2020.06.01 / 23:16
مولف
Axar.az
شرح لر
دیگر خبرلر

چوخ ایسته‌میشدی قاشلارینی اوینادیب اونو اله سالا، سونرا دا -حکایه

مجنون چکن بلالارا، گلیب "زلیمخان" دوشوب- شعیر

گؤزل سئوگیم، دادلی سئوگیم، قانایان یارام منیم- شعیر

اؤلوم ندیر کی،اونون گوجویله خالقا حقیرانه ائیلییم تعظیم؟!

چوْخداندی بیزی آیری کؤک اۆسته بیتیریبلر- شعیر

ساراجلیلاری سوجیلی، ماهروزلو، جفرآباد جامااتی ایله بیرلیک‌ده - حکایه‌

بیر کیچیک بالیغام من یالقیزام تونگ ایچینده - اوشاق ادبیاتی

لعنت اولسون بو یاشاییشا!

روحوم او تای‌دادیر، قبریم بو تای‌دا- شئیر

مکتبلر آچیب کسب ائدلیم علمو کمالی!- شئیر

خبر خطّی
 
Axar.az'da reklam Bağla
Reklam
Bize yazin Bağla