Axar.az
یوخاری
9 اییول 2020


داستان: واغ قوشو...

آنا صحیفه ادبیات
12 Punto 14 Punto 16 Punto 18 Punto

قونشو قیزینین آدین دنیز قویموشدو، من ده آسلانمیشدیم کی آدیمی دنیز قویمادیز بس آپارین دنیزی گؤروم، آتام دئییردی آی منیم تانریجا قیزیم سنی آپاراجایام دنیزلرین لاپ آناسین گؤره‌سن، من ده بو آرزیلا کی دولانماغا گئده‌جه‌یم گئجه‌م گوندوزوم دنیز دوشونجه‌سیله کئچیردی، بیر آخشام اوستو آتام گولومسه‌یه‌رک دئدی آی خانیم ییغ‌ییغیشیق إله‌یین ایکی گون یولا چیخاق، آتیلیب توشدوم کی دنیزه گئده‌جه‌ییک دنیزه گئده‌جه‌ییک!

گئجه‌نی یاتابیلمه‌دیم، او اوزدن ماشیندا اوتوردوغوم کیمی یوخو منی گیرله‌دی اوندا گؤردوم آنام دئییر دور قیزیم بودا دنیز باخ نه اوجو وار نه بوجاغی!

سانکی دونیا منیم اولموشدو، قاچدیم ساحیله، بالیق قولاق‌لاری بئله گؤزل گؤرونوردو سانکی ایسلاق قوم گئجه دیر اونلاردا اولدوز، آنام گیل چادیر قوروب اوتورموشدولار بیراز اویناقلاییب گلدیم آنام‌گیلین یانینا، آخشام اوستو آنام‌لا چیخدیق دولاناق، هر نه منیم ایچین چوخ ماراقلی‌ایدی، گاه آنامین ساغینا کئچیردیم گاه سولونا، بیردن گؤردوم داش اوسته قوش وار آما بئله باخیر دنیزه سانکی گؤزلریندن وای یاغیر، بئله قملی اوتورموشدو کی اولمایان کیمی، آناما دئدیم آی آنا بو نه قوشودو؟ نییه بئله باخیر سویا؟ آنام دئدی گل اوتوراق سن بالیق قولاغی ییغ من ده او قوشون ناغیلین دانیشیم:

ایللر اونجه گونلرین بیرینده تام باهارین آستاناسیندا داغلارین قاری اَرییب بولاقلار شاقیلداییب آغاجلار چیچک لنیب داغلار یام باشیل گیینیردیلر هر داشین یانینا باخسایدین بیر گؤورنتی واریدی هاوا دا چوخ گؤزل هردن بیر یاغیش چیله‌ییردی هردن گون چیخیردی هردن بیر یئل اسیردی آنام دئییردی ائله هر آن بیر تهر اولدوغونا خاطیر آدینی آغلار گولر قویوبلار . آی نه گؤزل اولور یازین گلمه‌سی.

اوغلانلار داغا اوچغونا گیدیلر قیزلار تره در‌مه‌یه . بیری سئل تاماشاسینا گیدیر بیری آت چاپیر. بیر گؤزل قیز گئدر چیچک درسین ، کؤرپه کؤرپه کهلیک اوتو درسین ، تره لردن دریب گتیرسین . کوله‌ش سبتین آلار چینینه گئدر داغا آی نه گؤزل اولور داغلار سرت قایالاردا بئله چیچک لر بیتیب اوتلار گؤوریب . قیز باشلار خوشونا گلن لردن در‌مه‌یه چوخ چکمز کی سبتی دولار قایالیقدا بیر گؤزل چیچک گؤرر گئدر کی اونو دا دریب سبته قویسون کی اوزونه بیر دامجی یاش دوشر باخار گؤرر وای یاغیش باشلادی دییر آی بولود باشینا دولانیم نه اولاردی بو چیچگی درندن سونرا یاغیردین ایندی من نئجه اونو دریم یئر یاش اولدو آیاغیم زویور!

بیرآز چالیشار گؤرر کی یوخ دا قایادان اوسده چیخماق مومکون دئییل . گلر سبدین آلار چینینه دوشر یولا آما آیاقلاری هئی آخیردی بیر دفه ده دوشر زورلا سبتی ساخلار کی ایچینده‌کی‌لر داغیلماسین آما گئیینه‌جکلری باتار. کنده ده سئل گلیرمیش بیر اوغلان گلر سئل تاماشاسینا بیر داشین اوسدونده اوتورار دالار سئلین بورولماسینا سسینه، اوغلان بو فیکیرلرله سئله باخیردی کی بیردن گؤرر بیر قیز سبت چینینده گلیر کورپودن کئچسین آی آمان بو قیز بو ‌آغیر سبتله هاردان گلیر سبت ده نه گتیریر دورار اونا کومک اوچون گیتسین کی قیزین آیاغی آخار سبتی‌له دوشر سئله . بیر آن ایچینده سانکی اوغلانین بوغازینا سورمه یاخیبلار سسی چیخماز آما قاچار سئله دوغرو آمان تانریم بس بو قیز نییه گؤرسن میر سئل دئیه‌سن بیر نهنگ اولدو قیزی اوتدو نه سبتی گؤرسندی نه قیز اوغلان سئلله آشاغی قاچار یوخاری گلر قیزی تاپماز آما دای او‌گوندن بری سسی ده چیخماز و هئچ کیم دای اوغلانین سسین ائشیتمز و هئچ بیرینه ده دانیشا بیلمز کی بیر تره‌دن گلن بیر قیزی سئل قاپدی قاچدی آما اوغلان همشه‌لیک گلر اوتورار قیز سئله دوشدویو ییرده سودان دا ایچمز اوره‌یینده دییر بلکه بو سو دا اوقیزین بیر ایزی وار ایچرسم ایز ایتر.

ایللر بئله سی کئچر بیر گون سحر تئزدن گؤررلر دای اوغلان یوخ اولوب و یئرینده بیر قوش اوتوروب کی هردن بیر واغ دئییر او قوشون آدی ائله واغ قوشو قالار . دئیرلر تانری هئچ اوندان اونجه بو قوشو یاراتمامیشدی!

تاریخ
2020.06.04 / 13:27
مولف
Axar.az
شرح لر
دیگر خبرلر

هاردا عدالت وار ، اوردا آزادلیق...!- شئیر

" اوُز آنا دیلیمده سوُیله " دئیرم-شئیر

اما بو ماشین قزایا دوشسه، بیردفعه‌لیک اولاجاقسان! -حکایه

سون ۲۰۰ ایلین ان یاخشی غزلی – سید عظیم شیروانی‌دن

قونشو دئدی :آی بالا بو قازانچا نه دیر؟

آرزومو گونشین تلینه ساردیم-شعیر

نه ائده‌جه‌ييني،‌هاراسا گئده‌جه‌ييني‌ده آنلاميردي....- حکایه‌

خوشبختلیین سیرری... - مشهور یازیچینین حکایه‌سی

بیر دویو دنه‌سی اوچون بو قدر یورولماغا دیر؟ - حکایه

نه گؤزل سوزولور قارا گؤزلرین... - شعر

خبر خطّی
 
Axar.az'da reklam Bağla
Reklam
Bize yazin Bağla