آنا صحیفه ادبیات |
کولت. آذ م. کاوسینین " پاخیللیق" آدلی حکایهسینی تقدیم ائدیر:
شاعیر م. ل.نین خستهخانا شعریندن الهام آلینیب
خستهخانانین بیر اوتاغیندا ایکی خسته یاتیب، اولارین بیری پنجره طرفینده، بیریسی ده قاپی طرفینده. اونلار بیر اوتاقدا اولدوقلاری اوچون بیر- بیرییله دوست اولوبلار. قاپی طرفینده اولان، اوجادان بیر آه چکیر، تئزجه یولداشی سوروشور:
- نه اولدو!؟
- سن پنجره طرفینده یاتیب، ائشیکده هر یانی گؤرورسن، من ده بوردا چورویوب قالمیشام.
یولداشی بو سؤزدن چوخ کدرلنیر:
- قورخما من گؤز اولارام سن قولاق، من بوردا نه گؤرسم سنه تعریف ائده¬جهیم.
- هه چوخ یاخشی اولار.
پنجرهدن باخان خسته باشلاییر تعریف ائتمهیه:
- باخ بو آغاج قلمه آغاجی دیر، یام- یاشیل گؤیه چکیلیب، قارقا بوداقلارینین اورتاسیندا یووا قوروب، ایکی چیچیک بالاسی وار. او طرفده آلما آغاجی اکیبلر، دولودور حاصیلینان، نه قیرمیزی آلمالاری وار. اوزاقدان دا بیر اوجا داغ گؤرسهنیر، باشیندا قار واردیر، بیر دسته دورنا او طرفده اوچماقدادیرلار، باخ یئل اسیر، یاپراقلاری ترپهدیر گونش ده ساچین آچیب هر یانا نور ساچیر، او طرفده بیر گنج اوغلان سئوگیلیسی یله گزیرلر، قورخما یولداش بیز ده بو گؤزل طبیعته قاییدیب، اؤلنه قدر بیر- بیریمیزی اونوتمایاجاغیق.
او دانیشدیقجا یولداشینین اورهیینده یاشاییش رنگه دؤنوب جانلانیب، گلجهیه اومودلانیردی. آما اونا بیر خوش سئوینج گلسه ده، کینه ایله پاخیللیق دا او قدر چوخالیردی، او فیکیرلشیردی کی، کاش من پنجره طرفینده اولایدیم، کاش من ده اؤز گؤزلریمله، دوستوم گؤردویو گؤزل طبیعتی گؤرهیدیم.
ایکی گوندن سونرا پنجره طرفینده اولان خستهنین بدنینین هر یانین درد توتوب، رنگی قارالدی، او بوغونتو بیر سسله دوستونا دئدی:
- تئز اول زنگین دویمهسینی بارماغینلا باس .
یولداشی بارماغین زنگه طرف آپاردی، اما بو آندا پنجرهنین ائشیییی یادینا دوشوب، پاخیللیق داماری قانلاندی:
- یوخ !!! من گرک پنجره طرفینده اولان تخته صاحیب اولام !!!!
بو فیکر ایله یاواش - یاواش بارماغینی زنگین دویمهسیندن قایتاردی.
ایشه باخ اونون یولداشی گونده گؤردوکلرینی هرآن بونا دئیهرک بونا حیات وئریب، یاشاییش باغیشلیر، بو دا بیر زنگین دویمهسینی باسیب، نئرسی خبر ائتمهیی اونا چوخ گؤروب، الینی گئری قایتاریر.
بو، زنگین دویمهسینی باسمیر کی، او اؤلسون، بلکه بو اونون تاختینا یاتسین، بئله ده اولور. او ایستهدییینه چاتیر !!!!!!
یولداشینین جنازه¬سینی آپاراندان سونرا بونو اونون تاختینا سالیرلار، داها او ایندی هر نهیی گؤرهجک، لازیم دئییل اؤزگه گؤزویله باخا، او ایندی ائشییه باخاندا خیاوانلاری، قلمه آغاجینی، قارقا بالالارینی خستهخانا حیاطینین گول- چیچکلری و ... نی اؤز گؤزویله گؤرهجک.
- هه.....قوی اؤزومه بیر گوج وئریب، قووزانیب ائشییه باخیم، دئدی.
آما ائشییه باخاندا بیردن رنگی آغاردی، اورهیینه سانکی بیر اوخ سانجیلدی، باشی گیجللنیب بیردن دؤشهیین اوستونه دوشدو:
- یوخ خ خ... اولا بیلمز..... اولا بیلمز!!!!
پنجره دالیسیندان گؤردوکلری، نه خیاوان ایدی نه آغاج، نه ده اوچان قوشلار !!!! بلکه بیر سیمیت دوار گؤیه چکیلمیشدی!!!!
اونون اؤلن یولداشی اونا امید وئرمک اوچون یالاندان او طبیعتی اونا یاراتمیشدی !!!!
آ......خ پاخیللیق سنه لعنت اولسون ... سنه لعنت اولسون!
تاریخ
2020.06.06 / 17:04
|
مولف
Axar.az
|