کولت. آذ زلیمخان یعقوبون "اینسانین اوریی گؤزل اولان‌دا..." آدلی شعیرینی تقدیم ائدیر:

قیش یازا چئوریلیر، قار چیچک آچیر،
اینسانین اوریی گؤزل اولان‌دا.
دونیا گؤزللشیر باش‌دان-آیاغا،
اینسانین اوریی گؤزل اولان‌دا.
دلی کولکلری مئهه دؤندریر،
بولودو گول اوسته شئهه دؤندریر،
قولو دا قالدیریب شاها دؤندریر،
اینسانین اوریی گؤزل اولان‌دا.
کاسیب یووانی دا گؤزللشدیرر،
چیرکلی هاوانی دا گؤزللشدیرر،
وحشی حیوانی دا گؤزللشدیرر،
اینسانین اوریی گؤزل اولان‌دا.
صحرادا گول اکیر، اورمان دوزلدیر،
دن سپیر، دن بیچیر، خیرمان دوزلدیر.
دردلره مین جوره درمان دوزلدیر،
اینسانین اوریی گؤزل اولان‌دا
سئوگیدن ساوایی بیر دینی یوخدو،
قان‌دا بیر نیفرتی، بیر کینی یوخدو.
گؤزون‌ده هئچ نیین چیرکینی یوخدو،
اینسانین اوریی گؤزل اولان‌دا.
ایشیق دا گؤزلدی، بولود دا گؤزل،
نغمه ده گؤزلدی، سوکوت دا گؤزل.
بئشیک ده گؤزلدی، تابوت دا گؤزل،
اینسانین اوریی گؤزل اولان‌دا...