بوتون جانیم قاشینیر. هر یئریمی یاغلاییب اوزادیب لار سنگرین قاباغیندا، قورو یئرده. کور میلچه یین سسی دوشوب باشیما. اَیری پالان کیمی باشیمین اوستونده مانوور وئریب، ویزیلداشیرلار. گؤزومو زیلله ییرم گؤیده کی اولدوزلارا، یوخ، منوّر آتیرلار، بیر آز پاریلداییب سونرا سؤنورلر. رزمنده لرین بیری هؤیول سنگردن چیخیب، قارنینی قاباغا وئره ـ وئره قاچیر سو تانکرینه ساری. گولمک سسی سنگری آلیر باشینا. رزمنده آفتافا اَلینده یورویور دره یه. اوجا سسله باشلاییر اوخوماغا: ـ «سئویرم چمنده گولو چیچه‌یی، گلنده ایلک باهار خاطیرلا منی!...»

گولمک له اوخوماق سسی قاریشیر بیر بیرینه. منیم جانیم دا قارپینمادا. بوینومون دالینی قاشیییب، دئییرم: ـ «دَده م قوربان! بورا نه جور جبهه دی؟!»

پارا آلمانین کومپوتو باسیلیر آغزیما. ـ «همیشه مازان، بی گون رمضان!»
پارا آلمانی تلَکه چئینه ییب اودورام. ـ «سن کیم‌سن؟ بوغدون منی.»
او قدَر گولوب، گؤزلری نین بولاغیندان یاش سوزور. ـ «چاکیرووه دئیَللر ایبیش...»

بؤیوره مه اولوب، دونوخورام اونا. اون بئش، یا دا اون آلتی یاشی اولار. ـ «سن ده سیجیلووه ال آپاریب گلیب سن؟»
آلمانین پاراسینی دا قویور آغزیما. ـ «فیکر ائلئیسن تک اؤزون او حوققالاری باشارئیسان!»
بورنومو قارپیرام. ـ «بو دره یه توشن بَه نییه اوخئی؟ به یه م منطقه جنگی دؤیر؟»

بارماغییلا گؤزومون دؤوره سینی سیلیر. ـ «آدی "فینی" دی. عادتیدی، توالته گئدنده اوجا سس نن اوخییار.»
یئنه کئچیر گولمکدن. فینی دا ائله دره‌نی آلیب باشینا. تکجه تار ـ قاوالی اَسکیک دیر. دئییرم: ـ «بیردا اوزاناننان نَم نئچه یول گیریبدی دَریه؟»

بارماغینی دایاییر دوداق لارینا. ـ «سیس! یازیغین تئشتین "اَسد بئچه" قویوب دای!»
سول الیمی قویورام چَنه مین آلتینا. ـ «نئجه؟! باشینا نه اویون گتیریب؟»
گولومسونور. ـ «اسد بئچه کئچن گئجه باشینین اوستونه قویدوغی سویون ایچینه بی ورق بیزاکودیل تؤکدی، دئدی سسین چیخارتمئیون، قویون بی ایکی گون فینی دویونجاغ بیزه اوخوسون!!»

بونو دئییب، دوروب گیریر سنگره. قولاق آسیرام: «بو گلن یار اولئیدی، اَلینده نار اولئیدی، ایکیمیز ...»
سسی اورَییمه یاییلیر. اؤز ـ اؤزومه دئییرم: آللاه ریضاسی سسی ده پیس دئییل ها.

بورا گون اورتانی سوووشموش یئتیشدیم. گرمیج اَسیردی. ائله بیل مندن قاباق بی سیم له گلیشیمی خبر وئرمیشدیلر. "پی ام پی" ـده داغین اَته یینده دوشجه‌یین، آهیل بیر بسیجی پالتارلی، آلچاق بویویلا منه هنده ور گلدی. قیرمیزی کولمن ینی ایری داشین اوستونه قویوب، الینی اوزاتدی منه طرف. ـ «نه گئژ یئتریردیلر... هاچاندی گونون آلتیندا توز تورپاغدا دایانمیشام سنی گودورم.»
الینی سیخدیم. ـ «سلام! هلال احمر ایمدادچی سیام.»

لیوانی دولدوروب، وئردی الیمه. ـ «ایش جانا گَل. خئیله م یول گئده جییوغ. منه ده "یوسوب عمی" دئیَیللر.»
ایچدیم. سرین آبلیمو شربتی ایدی. لیوانی قایتاردیم. چفیه سینی باشینا دولاییب، منه دئدی: ـ «چَک باشووا، توز تورپاغ گؤز باشووا گیرمه سون.»

یولا دوشدو. من ده کمک های اولیه جعبه سی الیمده دالییجاق. لال ـ دینمز داغی قالخیردیق. قوجا چانقیل-لارین اوستوندن جاهیل اوغلان لار کیمی یئرییردی. من اونا باخا ـ باخا اوسته چیخیردیم.

گون باتما ـ باتمادا، داها نفسیم کسمیشدی. آنجاق او هله ده یئیین ـ یئیین یولونو گئدیردی. هردن بیردن دؤنوب، دئییردی: ـ «اوغول بالا! قیوراق اول!!»

داغین دؤشونده، سنگرلردن ایشیق سیزیردی. منیم نفسیمین قارالان یئرینده، دؤنوب دئدی: ـ «دای یئتیشدوغ. آنجاغ اوغول! یاتمامیشدان قاباغ گَه منه باش ویر ها. تدارکاتدا اولییام.»

دیل داماغیم قوروموشدو. بیر لیوان دا آبلیمو شربتی اوندان آلماق ایسته دیم، آنجاق اوزوم گلمه دی. دیلیم له دوداغیمی یالادیم. ـ «ایندی من نئینئییم؟»

کولمنی یئره قویوب، قول لارینی چیرمالاییب، تله سیک جه دئدی: ـ «گئژدی... سنگرلرین بیرینده باشووی قوی یات. صاباح صوب فرمانده یه اؤزووی معرفی ائلَرسن.»

مندن آیریلدی. رزمنده لر گَل ـ گئتده ایدیلر. ایره لی گئدیب، سو تانکری نین بؤیرونده کی سنگره گیردیم. هئچ کیم یوخ ایدی. ائله بیل هاممیلیغا نامازا گئتمیشدیلر. اؤز - اؤزومه دئدیم صاباح صوبح قول - قیچیم توتولماسا یاخشیدی. تانکرین سویویلا دستنماز آلیب، ائله همن سنگرده نامازیمی قیلدیم. اوچ دؤرد پتو قالانمیشدی بیر - بیری نین اوستونه. پلنگی‌لردن بیرینی گؤتوروب، چَکدیم باشیما.
هاچانسا یاتدیغیمدان سونرا، بیر یول گؤردوم دَلیک دئشیک اولورام. قیشقیردیم: ـ «وای دَده وای!!»

یوخولو ـ یوخولو اؤزومو قارپیدیم. هر یئریم چالینیردی. گؤزو یوموق پتونو قیراغا آتیب، بدنیمین هر یئرینی قاشیماغا باشلادیم. آنجاق قاشیدیقجا، جانیم توخداماقدان بَترلشیردی. آرادا یوخوم دا قاچدی.

سنگرده بیر نئچه رزمنده اَیله شمیش، منه باخا ـ باخا گولوردولر. داها قالا بیلمه دیم، ائله بیر باشینا سنگردن چؤله قاچیب، بوتون پالتاریمی سویونوب تؤکدوم یئره. ـ «وای دَده! ...»

آتیلیب دوشوردوم. رزمنده لر ده بیر ایش گؤرمه‌دن، بیر - بیر منی دؤوره‌له دیلر. بیری دئدی: ـ «بیرانین گئجه سینین سَرین لییینه آللانما. کور میلچه لری دَده یاندیرئی... دَروووی دیری دیری سویاللار!»

رزمنده لرین بیری نفت سینکه سینی گتیرجه‌یین، اوچ دؤردو سس سسه وئریب دئدیلر: ـ «بیندان ویر، دینجل.»
گیجه للَنمیشدیم. آز قالا آغلایام، آنجاق نامیساگیر اولموشدوم. ـ «من نفتی نئینیرم آخی؟! اؤلییَم بابا!»
یوسوب عمی نین سسینی او هالا ـ هیرنا ایچینده تانیدیم. ـ «بَه یم دئمه دیم یاتمامیشدان قاباغ گَه منی گؤر؟»
بورولا ـ بورولا باشیمی قاشیییب، دئدیم: ـ «بیردا دای صدامین توپ توفه یینه احتیاج یوخدی... هامیسی نین جورون میلچه لر چَکئی دای.»

هامیسی ال لرینی سینکیه یه سالیب، ـ «گئجه لر یاتمامیشدان قاباغ بو یاغدان ویر، سورا یومول!» دئیه - دئیه، ال لرینی چَکدیلر جانیما. هله ده گولمک سس لری قولاغیمدا.

دره دن یئنه اوخوماق سسی گلیر. لون به له لوت دالی اوسته اوزانمیشام. بیری یوخدور منه دئسین: صدام ایندی حمله ائله سه، بئله لوت نه قاییراجاقسان؟

الیمی چکیرم اَینی ـ باشیما، جانیم داها یاغی چکیب اؤزونه. قارپینماغیم دا بیر آز توختاییب. سنگرین ایشیغی سؤنموش، سس ـ زاد دا چیخمیر. کور میلچک لر اَیری پالان لار کیمی باشیم اوسته ویزیلدانیرلار. الیم له اونلاری قووالاییب بیر ایکی یول چاغیریرام: ـ «ایبیش! آی ایبیش! ...»

سسیمه سس وئرن اولمور. گؤیه باخدیغیمدا، اولدوزلاری سایا بیلیرم، آنجاق داها منوّر آتیلمیر. ائله بیل عراقلی لار دا بونلار کیمی یاتیشیب لار. فیکریم گئدیر داغ ـ داشا. بیردن اورَییمه گلیر: بوردا کور میلچکدن سونرا، جاناوار ـ زاد دا اولارا؟!

هورکورم. سویوق تَر جانیما اَیله شیر. آیاغا دوروب پالتارلاریمی تئز ـ تئز گئیینیرم. گیریرم سنگره. گتیردیییم جعبه نی آچیب، ایچیندن یودوکینول قورصونو گؤتورورم. اوز توتورام دره یه ساری. اوردان حزین اوخوماق سسی گلیر: ـ «آنا من غریبم، غریب...»

سون.