کولت. آذ ۳۰ ایل اول شاعر مممد آرازین بؤیوک میرزه جلیله اتحاف ائتدیی "دونیا دوزلمیر.." آدلی .شعیرینی تقدیم ائدیر . شعیر بو گون ده آکتوال‌دیر... الله هر ایکی اوستادا رحمت ائل‌سین!

عمور ده توکنیر، سؤز ده توکنیر،
باشیمین آلتین‌دان یاستیق دا قاچیر.
اللردیر اوچوران، اللر تیکه‌نی،
چؤلوم‌دن یاز قاچیر، یازلیق دا قاچیر،
دونیا دوزلمیر کی، دوزلمیر، بابا!
کیم‌دن‌سه تئز دوروب کیمین اوشاغی
ایتینه داش آتیب بئش یوز ایل قاباق.
کیمین دییرمانی، کیم‌دن آشاغی...
بونلاری یئرین‌ده کیم اوتورداجاق؟!
دونیا دوزلمیر کی، دوزلمیر، بابا!
طرف‌سیز طرف‌ده دوز اوغلو دوزلر!
ترفگیر طرف‌ده سلاح، قان-قادا!
چایینی ایتیره‌ن ماوی دنیزلر
چیرپینیب، بوغولور گؤز قاباغین‌دا.
دونیا دوزلمیر کی، دوزلمیر، بابا!
کیمین‌سه دونه‌نی قبیرسیز قالیب،
کوتان‌چی باباسی دمیرسیز قالیب،
کؤروک‌چو آتاسی کؤمورسوز قالیب،
خمره‌سی، اورواسی خمیرسیز قالیب
دونیا دوزلمیر کی، دوزلمیر، بابا!
من تکدیم، جوت اولدوم: تکلندیم یئنه،
اؤزوم یوک چکه‌نه‌م،
اؤزوم ده یوکه‌م!
باخ‌سام "دؤز" دئیه‌نه، "دؤز" دئیی‌لنه
آغزیم‌دان قاپیلار اؤز هالال تیکه‌م،
دونیا دوزلمیر کی، دوزلمیر، بابا!
گئدیر یال داواسی، سوموک داواسی،
گئدیر وورهاوورلا چپیک داواسی،
گئدیر میلیونچونون قپیک داواسی،
چوروک فیکیرلرین چوروک داواسی...
دونیا دوزلمیر کی، دوزلمیر، بابا!
"منه‌م" دئیه‌نلرین منی گؤرونمور،
الی تتیک‌ده‌لر، اؤزو هدف‌ده،
آزمیش عقللارین چنی گؤرونمور،
ایتمیش، ایتیریلمیش باشلار کلف‌ده!
دونیا دوزلمیر کی، دوزلمیر، بابا!
هله بو دونیانین قئی‌لو-قالی چوخ،
بیلمه‌م زهری چوخ، یوخ‌سا بالی چوخ.
چوخ وئردیم اؤزومه بو سوالی چوخ،
عرضین نادانین‌دان آغساققالی چوخ!
بس نیه بو دونیا دوزلمیر، بابا!