آنا صحیفه ادبیات |
کولت. آذ طاهیر طاهیروویچین «رنگلی گؤز یاشلاری» حکایهسینی تقدیم ائدیر.
او، آیی گؤی اوزونده ایلک دفعه گؤرهنده ائله بیلیردی کی، اللهدیر. یاغیشی ایسه اللهین گؤز یاشلاری سانیردی. ائله بیلیردی کی، یالنیز الله آغلایا بیلیر.
اونو ننهسی بؤیوتموشدو. آتاسیز و آناسیز. ننهسینی «آنا» دئیه چاغیراردی. ایلک سئوگیسی ده او اولموشدو. او سئوگینین آدینی بو گونه کیمی تاپا بیلمهدی. بیر گون آناسی اؤلدو. ایلک دفعه اوندا آغلادی. گؤیه باخدی، بولود یوخ ایدی. ائله بیلیردی آناسی اوچون الله آغلایاجاق. الله آغلامیردی. اؤزو آغلادی کی، اونو قبیریستانلیقدا باسدیرماسینلار. حیطلرینین تن اورتاسیندا دفن ائتسینلر. اونو هر گون گؤرمک اوچون. چوخ آغلادی. اونون هؤنکور-هؤنکور آغلاماغینا فیکیر وئرهن اولمادی. تابوت گئتدی. اوزاقلارا.
داها سونرالار آتاسی اؤلدو. آغلادی. اما و لاکین بو، او آغلاماقدان دئییلدی. آتاسینین حیطلرینده دفن اولونماغینی خواهیش ائتمهدی. بیلمهدی نیه. تابوت گئتدی. اوزاقلارا.
اونون بؤیودویو حیطده زامان بؤیودو، اؤزو بؤیودو، آغاجلار بؤیودو و حتی اوریی بؤیودو. آغلاماق ایستهدی. اما اؤلن یوخ ایدی. آغلاماغا بهانه گزیردی. تاپا بیلمیردی. گولمکدن و گولدورمکدن بئزمیشدی.
زامان کئچیردی. اؤلنلر اوچون آغلاماق ایستییردی. اؤلن یوخ ایدی کی، یوخ ایدی. آغلاماغی اونوتموشدو. یالنیز گون ایشیغی دوشنده گؤزلری یاشاراردی.
او، سونونجو دفعه معلمیندن آیریلدیغیندا آغلامیشدی. معلمی وظیفهیه گئدنده. اما ایچینده. کدر یاشلاری ایچینه تؤکولموشدو. ائله بیلیردی، گؤز یاشلاری آرتیق بیتیب.
نهایت، اؤلمهیهن آدام اوچون آغلاماغا باشلادی. بلکه ده او، اؤلسیدی، آغلامایاجاقدی. اؤلمهیهنلره ده آغلاماق اولارمیش. اونون گؤز یاشلاری سؤیودلرین ساری ایشیغینا بنزهدی.
گوزگونون قارشیسیندا دایانیب آغلادی. تعجبلهندی. گؤزلرین۸دن آخان دامجیلار رنگلی ایدی. آخی بئله شئی نه ائشیتمیشدی، نه ده گؤرموشدو. قیرمیزی گؤز یاشینی آناسینین خینالی ساچلارینا بنزتدی. آغ رنگی ایسه آتاسینین آغ ساچلارینا.
ایندی باشا دوشدو کی، اونو آناسی و آتاسی قدر سئویرمیش. بو ایضطرابا نه آنا، نه ده آتا کؤمک اولدو. گؤز یاشلاری آخیب یئره سوزولدو.
تورپاغا یاییلمیش قیرمیزی گؤز یاشلاری قانا بنزییردی. بالاجا بیر قیز اوشاغی آناسینین ا۶۶لیندن یاپیشیب گئدیردی. قیرمیزی لکهلری گؤروب «آنا، کیمینسه بارماغی کسیلیب» دئدی.
اما قیزجیغاز بیلمهدی کی، بارماق یوخ، گؤزلردهکی اومید کسیلیب.
تاریخ
2020.06.29 / 12:30
|
مولف
Axar.az
|