کولت. آذ بختیار واهابزادنین "اؤزوم اؤزومو داندیم..." آدلی شعیرینی تقدیم ائدیر:

او گون... او مودحیش گون... سئوه‌رک سنی،
اوستونه تحقیردن اود الدیم من.
سنین اون بئش ایللیک اومیدلرینی
آرزونو، حسینی گولللدیم من.
ایندی من اؤزومو داندیم بوسبوتون،
باشقا جور باخیرام ایندی عالمه.
منیم صحبتیمین، منیم سؤزومون
دادی دا، دوزو دا سنسنمیش، دئمه...
سؤن‌دو سینه‌م‌ده‌کی او اود، او اوجاق،
بوش بیر قوووق کیمی هاوادایام من.
اینسان نفسین‌دن اوزاق، چوخ اوزاق،
وولکانی سویویان بیر آدایام من.
آغلیم اورییمه نئجه غییب‌دیر،
من اؤزوم-اؤزومه بیر یوک اولموشام.
سینه‌م‌ده اورییم بوز باغلاییب‌دیر،
بوداغی بودانمیش کؤتوک اولموشام.
نه چیچک اوخشاییر، نه اولدوز منی
فیکیرلر داغیلمیش، خیاللار ائنمیش.
یئرین ده، گؤیون ده گؤزللیینی،
سنین گؤزلرینله من گؤرورممیش.
گئجه‌لر دوزولور ساپا فیکیرلر،
یورغانیم داش اولور، دؤشییم تیکان.
سحرلر گؤزومو آچیب دونیایا
قالخماق ایسمیرم هئچ یاتاغیم‌دان.
یاتماق ایستییرم، یاتماق، باخ ائله
گؤزومو زیلله‌ییب تاوانا باخیم.
من هان‌سی آرزونون تلاتومویله
اینیمی گئیینیب قاپی‌دان چیخیم؟
قاچیرام، قاچیرام، سحرلر منه
بیر دئیه‌ن اولماسین - "صاباحین خئییر".
آخی، صاباحینی ایتیره‌ن یازیق،
صاباح‌دان شر اومور، خییر ایستمیر.
ائله بیل دایان‌دی یولو عؤمرومون.
بونا جان آتیردیم... بس آرزو نیدی؟..
حسرتله، وصاللا دولو عؤمرومون،
معناسی ایتینجه، اؤزو ایتی‌دی...
ایندی یولوم دوزدور... نه داغ، نه دره...
بو باش‌دان باخان‌دا، او باش گؤرونور.
کاش قیسمت اولایدی ایسته‌یه‌نلره
ائنیش‌سیز، یوخوش‌سوز، دالغاسیز عؤمور...
حیات چیرپینتییمیش... اونون هر گونو،
ایللرین یوکونو چک‌سه، نه دردیم...
من قورقود اولسایدیم، "سئوگی" سؤزونو
"یاشاماق" سؤزونه جیناس ائدردیم...