آنا صحیفه ادبیات |
کولت. آذ رامیز رؤوشنین "بولود" آدلی شعیرینی تقدیم ائدیر:
اورییمین غمینی.
گؤزلریمین نمینی،
قارداشیمین تویوندا
بوغوم-بوغوم بوغلانان
پلووون دمینی چکیب جانینا
باشیمین اوستوندن بیر بولود کئچیر.
آنام بولود، جانیم بولود،
سنی گؤردوم، باغریمین باشی گؤینهدی،
گؤزومون یاشی گؤینهدی،
ائویمین دیواری-داشی گؤینهدی، -
آل بو داش-دیوارین الیندن مئنی،
قورتار مئنی، آپار منی اؤزوننهن.
آنام بولود، آنامدان آرتیق بولود،
تئللری قیوریم بولود،
یاناقلاری باتیق بولود، -
منی یقین سن دوغموسان،
من سنین اوغلونام یقین.
من بولود اوغلویام، بولود بالاسی،
بولود قیریغییام، بولود پاراسی،
بولودنان دولویام باشدان-آیاغا.
چؤلوم بولود، ایچیم بولود؛
کؤکسومده اورییم -
بولود،
اینیمده پئنجییم، کؤینییم -
بولود،
آلنیمدا ساچیم -
بولود.
بولود-بولود ساچلاریمدان
داها بیر شئی قالمادی
بو آلنیمین قیریشینی گیزلتمهیه.
منی ایستتمهیه، عزیزلتمهیه
داها بیر شئی قالمادی، -
آنام بولود، باجیم بولود،
قورتار منی، آپار منی اؤزوننهن.
آنام بولود،
دردیمدن گؤزلری سولانان بولود،
اؤزونو یاددان چیخاریب.
بوتون گؤی اوزونو یاددان چیخاریب
بایاقدان باشیما دولانان بولود، -
سنی گؤرهن کیمی قانیم قاینادی،
کؤپوکلهندی -داشدی دامارلاریمدان،
باشیمین اوستوندن تئز کئچ، آماندی،
قویما، قانیم قاینادی،
قویما، قانیم بوخارلاندی،
اوچدو دامارلاریمدان،
قالمادی، قانیم قالمادی،
یاریجامم قالمادی،
تئز کئچ، آنام بولود، اؤلدورمه منی...
...اورییمین قمینی،
گؤزلریمین نمینی،
قارداشیمین تویوندا
بوغوم-بوغوم بوغلانان
پلووون دمینی چکیب جانینا
باشیمین اوستوندن بیر بولود کئچیر.
ساغلیقلا گئت، گئدن بولود،
گئدیب، گئدیب گؤزومدن ایتن بولود.
بیر ده بو یئرلره گلسهن، گلمهسهن،
بویلانیبان منی گؤرسهن، گؤرمهسهن،
غم ائلمه، آغلاماقدان داشم، گئت،
قوشون-قوشون بولودلارا قوشول، گئت،
منلی-منسیز دونیا همین دونیادی،
بو دونیانین بو دوروشو ساغ اولسون،
یئرده داشی، -گؤیده قوشو ساغ اولسون،
قوشلارین قانادلاری،
یئلپیکلهسین بولودلاری،
گؤی اوزونون بولودلان
قوشون-قوشون ساغ اولسون.
آنام بولود،
سن ده ساغ اول بولودلارین ایچینده،
یاغیشین ساغ اولسون،
باشین ساغ اولسون...
رامیز رؤوشن..
تاریخ
2020.07.03 / 16:37
|
مولف
Axar.az
|