سون‌سوز نیفرت

انگین چؤلون باشاباشی بیر توو قارلا اؤرتولموشدو. کیشی‌لرین ایکیسی ده گئجه‌نی یولدا قالمالی اولدوق‌لارینی حیس ائتدیلر. هاوا دورویدو، گون‌باتیمینا آز قالیردی، سول الده، ساوالان‌ین پارلاق زیروه‌سی، گؤیون آلنیندا ناخیش‌لانمیش بیر قار یازیتی ایدی. قارشی‌دا، یولون قوزئیینده، هاوا قارانلیق ایدی. قارانلیق هاوا، کامیون‌دان فرسخ‌لر اوزاقدایدی آنجاق کامیون عینادکارلیق‌لا قوزئیین قارانلیق هاواسینا ساری حرکت ائدیردی. قارانلیق بئله گؤستریردی کی، آزجا اوزاق‌دا، داها نه یول‌، نه اوفوق، نه گؤی، نه ده حتتا ساوالان‌ین بؤیوک آلنیندان خبر- اتر اولمایاجاق آرتیق. یاخیندا یئر، جیبه سوخولموش بیر یومروق کیمی، گئجه‌نین قالین سیسینده گیزلنه‌جک.

چؤلون یای‌لاری یوروجو اولوردو. کند ائولری و کومالاریندان باشقا هئچ نه گؤزه ده‌یمیردی. هر دن بئش- آلتی دانا جانسیز، توز-تورپاق باسمیش اَیری- اویرو آغاج اوزاق‌لاردان گؤرونوردو کی، دئیه‌سن قورغو قورماق اوچون بیری- بیرلرینه یاخین‌لاشیبلار. یول‌دا، اؤنده بیر ماشین گئتسه‌یدی،یئرین- گؤیون توز- تورپاغینی بیری- بیرینه تیکردی. یئرین یئتکین‌لیک و داهی‌لیک‌دن دولغون طبیعتینی گؤرمک اوچون ان آزی اوتوز- قیرخ فرسخ قوزئیه ساری گئتمک گره‌کیردی. موغان‌ین بنزرسیز ، دوپ‌دورو گؤیونون آلتیندا،گؤز ایشله‌دیکجه، بوغدالارین اوزون گنج سونبول‌لری، هر بیر خیردا اسینتی‌دن، هر بیر کؤورک چووغون‌ حرکتی ایله باش ترپه‌دیردیلر. سونرا ایسه، یوکسک‌لیک‌لرین اَییملی یاماج‌لاریندان باش قالدیریردیلار، آما باش دؤندوروجو رنگلی اورمان‌لارین قالیندیر آغاج‌لارینا یئتیشمه‌دن، آلچاق‌کؤنول‌لوک‌له گئری چکیلیردیلر. اورمان اؤنجه ذره- ذره باشلانیردی، تپه‌لری ایسه آرا- سیرا ساچی تؤکولموش یاغلی باشا اوخشوردو، سونرا بیردن، مئشه‌لرین توم ساچ لاری‌یله، مین‌لرجه قوش و حئیوانین گیزملی گؤزلری‌ ایله، میوه‌لر و یاپراق‌لارلا دولو هویوخدوروجو و اورکودوجو یوکسک‌لیک‌لر باشلانیردی؛ او قدر بیتکی‌دن، کؤک‌لردن و گؤیه ساری چکیلن آغاج لاردان اؤرتولموشدو کی، نه اونلارین یئری گؤرونوردو، نه قول- بوداق‌لارین آراسیندان ایچ‌لرینده‌کی هاوا، نه ده اورالارا حاکیم اولان گؤی اوزو گؤرونوردو. آری‌لار گول‌لرین عطرینی بو اورمان‌لاردان امیردیلر، اورمان‌لاردان گونئیه ساری اوزون یولچولوق‌لاریندا، عطیرلری اؤز درین‌لیک‌لرینده پارلاق و شیرین اولدوزلارا چئویریردیلر، یولچولوغون سونوندا ایسه، شهدلرینی ساوالانین های- کویلو و زومزومه‌ دولو اله‌یینده اله‌ییردیلر. ساوالان اؤز مؤحتشم و شیرین یالنیزلیغیندا بالی پیشیریب، قَواما گتیریردی، سونرا دا خئیر- برکتینی ایکی ال‌لی، اونون سرین، قیریلقان و قوتسال داش قایالاریندان دیرمانماغا قاتلانان‌لارا سونوردو.

آنجاق ایندی قیش فصلی‌یدی. توز- توپراق‌دان خبر یوخ ایدی. آری‌لار کهکشانیندان دا ایز- توز یوخ ایدی. ساوالان‌ین آیاق‌لاری آلتینداکی چؤل ایسه، داریخدیریجی دییلدی. ایندی هر شئی تر- تمیز، آغ- آپباق ایدی؛ گؤزلوک اولمادان، قار گؤزلری اینجیدیردی. باشقا سوروجولر کسین‌لیک‌له تهلوکه‌نی اؤنجه‌دن تخمین ائدیب، گلمک ایستمه‌میشدیلر. دئو کامیون‌لارین سوروجولوری، بو تورک سوروجولر، هاوانین خراب اولدوغونو قوخلاردیلار. بیلردیلر کی، نئچه فرسخ صاف- دورو هاوایا توولانمامالی‌دیرلار. تبریزدن یولا دوشمزدیلر، حرکت ائتسه‌لر ده، یاواش- یاواش یولون اوزه‌رینده‌کی قارلاری یاراردیلار، یا دا ازیب، اریدیب، گلردیلر. ان قیسا سوره‌ده، تهلوکه‌لی بیر یووارلانما سونراسی بالاجا داغ کیمی یول قیراغینا دئوریلن ایلک کامیونو گؤردوک‌لرینده، اؤن‌گؤرمه حیس‌لری ایشه دوشردی و اونلاری یول اوستونده‌کی ایلک قهوه‌خانادا یاتماغا مجبور ائدردی. اوندا ایسه، سو اود، قهوه‌نین قارانلیق کونجونده، لامپانین جانسیز ایشیغیندا، آدام‌لارین قورو بوغازلارینی کباب ائلردی؛ یاغلی، پئشه‌کار ال‌لری آبگوشت کاساسینا گیریب، چیخاردی، و بیر داها گیرردی، سونرا، گرامافون‌لا سس‌- سسه وئریب، قابان و حسرت دوغوران خاطیره‌لی تورک ماهنی‌سی قیرتلاق‌لاردا سوزوله‌رک، بیرلیک‌ده اوخونان بیر ماهنی‌یا چئوریلردی:

پیالالاری رف‌ده‌ دی
گؤرمه‌میشم بیر هفته‌دی
یار بیزه قوناق گله‌جک
سؤز وئریب صاباح گله‌جک
بیلمیرم هاواخ گله‌جک
یار بیزه قوناق گله‌جک

ماهنی قورتولاندان سونرا، هاممی بیر- بیرینه دولاشاردی. سونرا یوخو گلردی، یورغون- آرغین کیشی‌لری آلیب، گؤوده‌لی بوی- بوخون‌لارینی قهوه‌خانانین بیر بوجاغیندا، پتو یا دا یورغان آلتیندا بورگه‌له‌یردی. ائشیک‌دن، پنجره‌نین سینیق جام‌لاری‌نین یئرینه یاپیشدیریلان قزئت‌لرین سیزیغیندان بیریسی باخسایدی، هئچ شوبهه‌سیز، لامپانین جانسیز، سیسقا، اؤلو- وای ایشیغیندا اونلارین قابارمیش یاناق‌لارینی، داغینیق قالین بیغ‌لارینی و قیرخیلمامیش نئچه گونلوک ساققال دیب‌لرینی سئچه بیلردی. خیال گوجونو ایشه سالسایدی بیله، یالقیز ارکک‌سی قوخوسونو دا آلاردی، بلکه ده اونلارین دوشله‌دییی یول‌لاردان، اینسان‌لاردان، ائولردن و باشقا قهوه‌خانالاردان دا خبر توتا بیلردی و باشا دوشردی کی، یول‌لار و گدیک‌لرین، قارلار و چیغ‌لارین دولانباج خریطه‌لریندن دولو اولان بو کیشی‌لر بیله، یوخو ایچینده اولاندا، زورلا آیاقدا دوروب، نئچه آددیم تات ائله‌ییب، ییخیلان یا دا اؤزلرینی تله‌سیک آنا- آتالاری‌نین قوجاغینا آتان، سونرا دینج‌لرینی آلاندان سونرا یئنه باشدان یولا دوشن اون- اون‌ایکی آیلیق کؤرپه‌لر قدر ساده، معصوم و باشاراجاقسیزدیرلار .