ایللر اول یاز واختی اسب هکی‌می منه تمیز هاوا بویورموش‌دو. آغجابه‌دییه گئتدیم. آغ گؤل میللی پارکینین یاخینلیغین‌داکی اوبادا قارداشیمین بالاجا بیر داخماسی واردی. چوخ ساکیت، جننته بنزه‌یه‌ن بیر یئرده تیکیلمیش‌دی. گؤل طرف‌دن اس‌ن سرین مئه، روحا دینج‌لیک گتیره‌ن یاشیل‌لیق، آدامی سرمست ائد‌ن ایده قوخوسو... سحرلر تئز قالخیب گزیردیم و اؤزومو چوخ گومراه هیسس ائدیردیم.

بیر گون گؤردوم قارداشیم کؤشکول‌ده بالاجا، یومروق بوی‌دا ایت بالالارینی هاراسا آپاریر. دالینجا دوشدوم. او، یاوروجوقلارین دؤردونو ده اول‌دن قازیب هازیرلادیغی قویویا آتدی، اوستونو تلسیک تورپاقلادی.

دلییه دؤندوم!

قاچیب کوچوکلری چیخارماق ایستدیم، ایمکان وئرمه‌دی.

بیردن امجکلری سودله دولو ایت گؤرون‌دو. هینه گیریب بورنو ایله بالالارینی سای‌دی و هیه‌جانلا باییرا چیخ‌دی. اونون ایچین‌ده آدامین سوموکلرینی اوشودن ساکیت بیر زینگیلتی واردی.

تؤوله‌یه گیردی، داخمانین قاباغینا قاچ‌دی، قویروغو ایله ائوین قادینین‌دان مرهمت دیله‌دی.

لاقئیدلیک!

اؤزونو اوت تایاسینا چیرپ‌دی، کرمه‌لری یالادی، هینه گیریب بیر ده چیخ‌دی، بوتون تیکی‌لیلرین دیبی ایله بالالارینین قوخوسونو آختاردی. ان آخیردا قارداشی‌می تاپیب اوستونه سیرمان‌دی. قارداشیم اونا تپین‌دی. ایت منی آدام یئرینه قویمادان زینگیلتی‌سینی ده گؤتوروب قئیب اولدو.

قارداشیما قیشقیردیم.

«وحشی‌سه‌ن» دئدیم.

علینی ایشده‌ن سویوتمادان تمنکین‌لی سسله بویوردو: «سیله‌مه، گئت، درمالارینی آت! گؤزو آچیلمامیش کوچوکلری همیشه باس‌دیریرلار، بیلمیرسن؟ ایت اؤزو بیلیر، سن بیلمیرسن.»

سوسدوم. آرالاندیم. ائله همین گون وئش-ووشومو ییغیب شهره قاییتدیم.

...ایندی او چاره‌سیز زینگیلتی سسینی اینسانلارین ایچین‌دن ائشیدیرم.