بو گون ۲۰-جی عصر آذربایجان ادبیاتینین تانینمیش نماینده‌لرین‌دن اولان عباس صحتین آنیم گونودور. کولت. آذ بو مناسیبتله شاعرین "یای سحری" شعیرینی تقدیم ائدیر.

اود توتوب قیرمیزی آتشله یئنه یاندی اوفوق،
شفقین قیرمیزی رنگیله ایشیقلان‌دی اوفوق.

بیر قدر چای‌دان اوزاق، اود قالامیش داغدا چوبان،
اویادیر اؤز سوروسون اوتلایا یایلاقدا چوبان.

یوموشاق گؤی چمن‌ین اوسته دوشوب شئه گئجه‌دن،
ایستی یوخدور، هله وار بیر بالاجا مه گئجه‌دن.

آغ دومانلار اوجالیر گؤی اوزونه داغلاردان،
چوخ سرین‌دیر هاواسی، کئچمه بو یایلاقلاردان.

گون چیخیر، گؤیده بولود قیرمیزی رنگه بویانیر،
کندلیلر چوخ یورولوب، اویقودان ایندی اویانیر.

پیه‌دن مال-قارانی بعضی چیخاردیر قیراغا،
بعضی صحرایه گئدیر ایشله‌مه‌یه، بعضی باغا.