کولت. آذ رسول رضانین "وطن دئدیم..." آدلی شعیرینی تقدیم ائدیر:
خفیف یئلدن تیترهیهن
یارپاغینا وطن دئدیم.
یانیق، قورو،
گؤی ککلیکلی،
بوز قومرولو
تورپاغینا وطن دئدیم.
داغلارینین کؤپوک دومان
دوواغینا وطن دئدیم.
تاریخینین
یاخینینا،
اوزاغینا
وطن دئدیم.
باغلارینین
یاسهمهنلی بوداغینا
وطن دئدیم.
گنجلرینین
نغمه-نغمه دوداغینا
وطن دئدیم.
اورک کیمی
گئجه-گوندوز حرکتلی
ایش و هونر میدانینا
وطن دئدیم.
بو گونونه، دؤورانینا
وطن دئدیم.
دالغالانان
آل شفقلی بایراغینا،
تنها، اوجقار بیر داخمادا
یانان نورلو چیراغینا
وطن دئدیم.
کؤهنه، یئنی
قارا قیزیل یاتاغینا،
ایلدهن ایله شؤهرتلنهن
آغ قیزیلین سوراغینا
وطن دئدیم.
بوللور، سرین بولاغینا،
اینسان یوردو - اوجاغینا،
تونج ظفرلی کئچمیشینه،
گلهاگللی بو چاغینا،
ایستی، عزیز قوجاغینا
وطن دئدیم.
من وطنین قوینوندایام.
وطن آدلی بیر تورپاغین
بورجو هر آن بوینومدادیر.
قئیرتینی چکمیشهم ده،
چکیرم ده.
تورپاغینی اکمیشهم ده،
اکیرهم ده.
یوللاریندا - یوکسلیشده
پوچور-پوچور آلین تری
تؤکموشهم ده،
تؤکورهم ده.
من وطنین قوینوندایام،
وطن منیم قوینومدادیر.
هم قئیرتی،
هم قایغیسی،
هم شؤهرتی -
بؤیوک بورجو
بوینومدادیر!
بوینومدادیر!...