یانوارین ۹-او خالق شاعری زلیمخان یعقوبون آنیم گونو ایدی.

Kult.az خبر وئریر کی، زلیمخان یعقوب ۱۹۵۰-جی ایل یانوارین ۲۱-ده گرجستان رسپوبلیکاسینین بورچالی محلینین کپنک‌چی کندین‌ده آنادان اولوب. او، ۱۹۶۷-جی ایلده دوغولدوغو کندده اورتا مکتبی، ۱۹۷۲-جی ایلده ایسه آذربایجان دؤلت اونیورسیتتینین کیتابخاناچیلیق فاکولته‌سینی بیتیریب.

۱۹۷۳-جو ایلده‌ن ۱۹۷۸-جی ایله قدر "آذرکیتاب" سیستمین‌ده، "کیتاب پاساژی" آدلی کیتاب دوکانین‌دا ساتیجی، باش ساتیجی، شعبه مدیری، ۱۹۷۵-جی ایلده‌ن، ۱۹۸۵-جی ایله قدر آذربایجان کؤنوللو کیتاب سئورلر جمعیتین‌ده تبلیغات شعبه‌سینده رداکتور، شعبه مدیری، ۱۹۸۷-جی ایلده‌ن ۱۹۹۴-جو ایله قدر "یازیچی" نشریاتین‌دا پویزییا شعبه‌سین‌ده رداکتور، شعبه مدیری وظیفه‌لرینده چالیشیب.

۱۹۹۵–۲۰۰۵-جی ایللرده آذربایجان رسپوبلیکاسینین ملی مجلی‌سینین میلت وکیلی اولوب. ۲۰۰۵-جی ایلده «آذربایجانین خالق شاعری» فخری آدینا لاییق گؤرولوب.

ایلک شعیری ۱۹۶۶-جی ایل اوکتیابرین ۴-ده،گرجستانین بولنیسی رایون قزئتی «غلبه بایراغی»ندا درج ائدیلیب.

۱۹۸۳-جو ایلده آذربایجان یازیچیلار بیرلیینین عضوو، ۲۰۰۸-جی ایل آوگوست آیینین ۲۹-دا ایسه آذربایجان آشیقلار بیرلیینین صدری سئچیلیب.
زلیمخان یعقوبون گؤرکملی دؤلت خادیمی حیدر علیئوه اتحاف ائتدیی «ابدیت داستانی» پویماسی حاقین‌دا شاعر-پوبلیسیست علی رضا خلفلی «اؤلمزلیک نغمه‌سی» («وطن» نشریاتی، ۲۰۱۳) آدلی کیتاب یازیب.

اونون «شاعر هارایی»، «وطن یارالار»، «سیزی قینامیرام» و «زیارتین قبول اولسون» کیتابی تاغییئو آدینا مکافاتا لاییق گؤرولوب.
زلیمخان یعقوب اوزون مدت بؤیرک چاتیشمازلیغیندان اذیت چکیب. تورکییه، آلمانییا کیمی اؤلکه‌لرده معالیجه آلیب. هر ایکی بؤیریی اولمایان اجتماعی خادیم عمرونون سون ایللرین‌ده دیالیز قبول ائتمکله یاشاییب. او، ۲۰۱۶-جی ایل یانوارین ۹-دا دونیاسینی دییشیب.

گل، منیم عمرومون شیرین دونیاسی،
محبت آدلانان پیرین دونیاسی،
فرهاد افسانه‌سی، شیرین دونیاسی،
قالامی اوچوروم، قایامی چاپیم،
من سنین قلبینه نئجه یول تاپیم؟

عمروم سنه ساری دوشن گوزاردی،
اولی بئشیکدی، سونو مزاردی،
آی الله، بو آزار نه خوش آزاردی،
اورک آغریلاریم، کؤنول عذابیم،
من سنین قلبینه نئجه یول تاپیم؟

اورکدون-اور‌یه دیل کؤرپوسو وار،
گؤروشدن-گؤروشه گول کؤرپوسو وار،
گیزلی سئودالارین قیل کؤرپوسو وار،
چاتارمی کئچمه‌یه دؤزوموم، تابیم،
من سنین قلبینه نئجه یول تاپیم؟

کئشیک‌چی آییقدی، گؤزتچی متین،
ایزله‌مک قورخولو، بویلانماق چتین،
هاساری هوندوردو بو عمارتین،
تیلسیم‌لی پنجره‌م، قیفیل‌لی قاپیم،
من سنین قلبینه نئجه یول تاپیم؟

گئجه‌لر شام کیمی اریتدین منی،
گوندوزلر یول اوسته قوروتدون منی،
گؤزله‌ده-گؤزله‌ده چوروتدون منی،
اؤرتولو دفتریم، باغلی کیتابیم،
من سنین قلبینه نئجه یول تاپیم؟

توفان‌می قالدیریم، مئهه‌می دؤنوم؟
یاغیشمی یاغدیریم، شئهه‌می دؤنوم؟
قولامی چئوریلیم، شاهامی دؤنوم؟
چمه‌نیم، چیچییم، گولوم، گولابیم،
من سنین قلبینه نئجه یول تاپیم؟

تانری سووغاتیم‌سان، دین ایشیغیمسان،
سحر شفقیم‌سن، دان ایشیغیم‌سان،
ان شیرین لهجه‌م‌سن، دانیشیغیم‌سان،
بوتون سواللارا سن‌سن جوابیم،
من سنین قلبینه نئجه یول تاپیم؟
منیم ایلک سئوینجیم، سون ایظتیرابیم،
من سنین قلبینه نئجه یول تاپیم؟​