Kult.az موسی یعقوبون "بو قار" شعیرینی تقدیم ائدیر.

بو قار یامان توتدو سویوق واختیمی
نه تئز اوست-باشیمی قارا بله‌دی.
سویوقلوق بله‌دی،
سویوق بله‌دی…
بیر سئوگی ایستیسی کؤنلومه دولماز،
ائله بیل باخیشیم سویوق بیر آلماز،
ائله بیل نفس‌یم،
هوس‌یم سویوق،
ائله بیل چمنم قیروولانمیشام،
بیر چوخ حسلریمی جیلوولامیشام،
نه بیلیم، بلکه ده یورغونام بیر آز…
بو قار یامان توتدو سویوق واختیمی -
ترتمیز، گول کیمی، گولدن ده تمیز،
یاغیر آرام-آرام سویوغا هریس.
اوزاق‌دا افق‌ده قاشلار آغاریر،
اول سویوق-سویوق داشلار آغاریر.
آغاریر صاحبسیز بیر ائوین دامی،
قاری گؤیده اودور سوبالی داملار.
بوغلانیر چینارین چیلپاق اندامی،
مامیرلی بوداغین اوستو گوموش قار.
او قیزین یاناغی دؤنوبدور اودا،
قار اود کیرپیینه ایلیشه بیلمیر.
هارداسا بیر ککلیک یوواسینا دا
هله‌لیک بو سویوق گیریشه بیلمیر.
کؤهنه بیر سوبانین یانیق کرپیجی
حاسارین دیبینده قارالیر هله.
او قیزیل کولچه‌سی اولسایدی اگر،
اونو قار توتاردی قالمازدی بئله.
قوشا کئچه‌نلرین ایزی بوغلانار،
قارین نه هنری یاغسین او ایزه.
بلکه ده، دونیادا قار آدامی وار،
سویوق‌دولار دئیه چیخمیرلار اوزه...

قار یاغیر ترتمیز،
گولدن ده تمیز،
یاغیر آرام-آرام سویوغا حریص.
بو تورپاق نه زامان گونشدن دویوب؟..
کؤهنه اوجاق یئری دیکسینیر قفیل.
کؤنلوم‌ده بیر غریب اومید سویویوب
قار اونون اوستونه یاغیر ائله بیل...

بو قار یامان توتدو سویوق واختیمی…
یاغیر آرام-آرام قار، بیره‌م-بیره‌م،
بیر چوخ دویغولاردان یوخدو گرییم.
ایلک دفعه…
بیلمیرم…
نسه بیلمیرم،
بو گون سویوقلوقدان قورخدو اورییم...