آدلیم تخلصو ایله تانینان توحید نامور ۱۹۷۴-جو ایلده مغان‌دا آنادان اولوب. اوشاق یاشلاریندان ادبیاتا ماراغی اولان شاعر ۱۹۹۰-جی ایلده‌ن شعیر یازماغا باشلاییب. توحیدین "منه گؤزلرینده بیر دنیز گتیر" آدلی شعیر کیتابی گونئی‌ده چاپ اولونوب.

Kult.az گونئی‌لی شاعر توحید نامورین «سنی بو دنیزه کیم آتدی آخی؟» شعیرینی تقدیم ائدیر:

بو ایلکی عذابدی، او سونو درددی،
مامیری کدردی، یوسونو درددی.
سن کی، اوتورموشدون، ده، کیم ترپتدی؟!
سنی بو دنیزه کیم آتدی آخی؟

سئوگی تلاطم‌لو حیاتدی باخسان،
هر دالغا یویه‌نسیز بیر آتدی باخسان،
آتلار بیر-بیریندن ایناددی، باخسان.
سنی بو دنیزه کیم آتدی آخی؟

هله مین اویونا قاتاجاق سنی،
دالغالار آتاجاق، توتاجاق سنی،
بیر کؤپک بالیغی اوداجاق سنی،
سنی بو دنیزه کیم آتدی آخی؟

قارشینا دمیر باش تیلوو چیخاجاق،
آیاق بوز، باشیندان آلوو چیخاجاق،
یولونا سو آلتی کالاو چیخاجاق،
سنی بو دنیزه کیم آتدی آخی؟

سویون سو آتشی، سو اودو اولور،
دنیزده جینایت سو آلتی اولور،
قولدور ناقالارین سو کولتو اولور،
سنی بو دنیزه کیم آتدی آخی؟

مایاکلار ساحلده سؤنه‌ن اوجاقدیر،
گؤرونن بو لیمان یوخ اولاجاقدیر،
اومیدین یئلکه‌نی ییخیلاجاقدیر،
سنی بو دنیزه کیم آتدی آخی؟

کور اولار، بیر ایشیق ساچماز اومیدلر،
باتارسان، قانادین آچماز اومیدلر،
دنیزدن ساحله اوچماز اومیدلر،
سنی بو دنیزه کیم آتدی آخی؟