اورمیه شهری اورمیه گؤلوندن ۱۸ کیلومتر غرب‌ده یئرلشیر. ایالتین داغلاری اونو تورکییه و عراق‌دان آییریر. اورمییادا هاوا قیش‌دا سویوق، یای‌دا مولاییم و سریندیر.

۲۰۰۶-جی ایلده آپاریلمیش رسمی سیاهییا آلمانین یئکونلارینا اساساً اهالی‌سینین سایی ۵۷۷،۳۰۷ نفردیر.

اورمییا شهرینین تاریخی چوخ قدیم دؤورلره گئدیب چیخدیغی قید اولونور. شهرین اهالی‌سینین اکثریتی، یعنی تخمیناً ۹۰ فایزی آذربایجان تورکلریندن عبارتدیر.

اورمیه شهری بئش بؤلگه و یا ناحیه‌یه آیریلیر:

-مرکز: برندوزچای، شیمالی برندوزچای، جنوبی برندوزچای، باش قالا، باخشیلیچای، تورکمن، دؤل، رضاچای، جنوبی نازلیچای و اورمییا شهری.

-انزلی: جنوبی انزلی، شیمالی انزلی. مرکزی قوشچودور.

-سیلوانه: ترگاور، مرگاور، دشت. مرکزی سیلوانادیر.

-سومای بردوست: جنوبی سومای، شیمالی سومای، بردوست. مرکزی سئرودور.

-نازلی: تولاتپه، نازلیچای، شیمالی نازلیچای. مرکزی نوشیندیر.

اورمییادا کندلر سانکی یاشیللیغا بورونموش وضعیتده‌دیر.

شهرین شرقین‌ده یئرلشه‌ن اورمییا گؤلو، دونیانین ایکینجی بؤیوک دوز گؤلودور و ترکیبین‌ده اولان مینراللارلا دونیادا بؤیوک اهمیت داشیییر. اورمییا گؤلونون اراضی‌سی، ۵.۲۰۰ کوادرات کیلومتردیر. اما سون ایللر گؤلون گوندن-گونه قوروماسی نتیجه‌سینده اراضی‌سی خئیلی آزالیب.

اورمییا شهرینین اهالی‌سینین گونده‌لیک دولانیشیغی اکینچیلیک، حیواندارلیق، صنعتکارلیق و تیجارت‌دن عبارت‌دیر. توخوجولوق و صنعتکارلیق شهرده ان چوخ یاییلان فعالیت نؤولریندن بیریدیر.

اورمییادا توخونولان خالچالارین گؤزللیگی و کیفیتی، شاهمات تاختالارینداکی ظریف‌لیک و اوزرینده‌کی ناخیشلار یالنیز غربی آذربایجان‌دا دئییل، قونشو دؤولتلرده ده مشهورلاشیب. اوستا رساملارین الین‌دن چیخان رسم اثرلری، مینیاتورلر، کیتاب و قلم قابلارینین اوزرینده‌کی ناخیشلار بؤیوک ماراغا سبب اولور.

شهرده اونیورسیتتلر، دینی تحصیل مرکزلری، قدیم و عینی زامان‌دا بؤیوک اولان «کهنه بازار»، موزی و افشارلار دؤورونه عایید صنعتکارلیق نومونه‌لری اولان بینالار وار.