مارتین ۱۹-دا اردبیل شهرینین بالیقلی چایی ساحلینده هر ایل کئچیریلن عنعنوی نوو اوستو (سو اوستو، بولاقباشی) مراسمی کئچیریلیب.

Kult.az خبر وئریر کی، حکومتین تطبیق ائتدیی بوتون محدودیتلره باخمایاراق، بو ایل ده چرشنبه گونو سحر ساعتلاریندا مراسمی کئچیرمک اوچون مینلرله اردبیللی و اطراف بؤلگه‌لردن گلنلر بالیقلی چای ساحلینه توپلاشیبلار.

عادته گؤره هر ایل اردبیللی قادینلار ایلاخیر چرشنبه‌دن بیر گون سونرا اؤزلری ایله سو کوزه‌سی، قایچی و سوپورگه گؤتوره‌رک بالیقلی چایینین «یئددی گؤز» کؤرپوسونون کنارینا توپلاشیرلار و اورادا «سو اوستو» مراسیمینی کئچیریرلر. اینانجا گؤره، مراسیم آرزولاری چین ائتمک و چتینلیکلری آرخادا قویماق مقصدی ایله حیاتا کئچیریلیر.

مراسم زمانی سویون اوزونو سوپورمک، قایچیلاماق، کهنه آیاق‌قابیلاری سویا آتماق و س. کیمی ریتواللار یئرینه یئتیریلیر.