آی کاغان گونلرین بیر گونو هامیله اولوب بیر اوغلان اوشاغی دوغور. گؤزلری آلا، ساچلان، قاشلاری قارا بو گؤزل اوغلان آناسینین ایلک سودونو امیب داها اممیر، دیل آچیب چی ات، بیشمیش یئمک، شراب ایستییر. قیرخ گونه بؤیویور، آیاغی اؤکوز آیاغینا، بئلی قورد بئلینه، کؤکسو آیی کؤکسونه اوخشاییر. بده‌نی باش‌دان- باشا توکله اؤرتولو ایمیش. ایلخییا باخیر، آت مینیر، خالقا اذیت وئره‌ن وحشی حیوانلان اوولاییردی. یئنی‌لمز بیر ایگید ایدی.

اوغوز بیر گون تانرییا یالوارارکه‌ن گؤی‌دن بیر ایشیق دوش‌دو. یویوروب گؤردو کی، ایشیغین اورتاسین‌دا گؤزل بیر قیز اوتوروب. قیزی سئویب آلدی. گونلر، گئجه‌لر کئچدیک‌دن سونرا قیزین اوغوزدان اوچ اوغلو اولدو: بیرینه گون، ایکینجی‌سینه آی، اوچونجوسونه اولدوز آدی قوی‌دولار. یئنه گونلرین بیرین‌ده اوغوز اووا گئت‌دی. گؤل اورتاسین‌دا بیر آغاج گؤردو. آغاجین کوغوشون‌دا گؤزل بیر قیز اوتورموش‌دو. اوغوز اونو گؤره‌ن‌ده آغلی باشین‌دان گئت‌دی. قیزی آلدی. گونلر، گئجه‌لر کئچه‌ن‌دن سونرا او دا اوچ اوغلان دوغ‌دو: بیرینین آدینی گؤی، ایکینجینینکینی داغ، اوچونجوسونونکینی دنیز قوی‌دولار. اوغوز خالقی باشینا ییغیب، یئمک- ایچمک وئردی. مج‌لی‌سین سونون‌دا دئدی:

من سینلرقه بولدوم کاغان، آلالینق یا، تاکی قالقان. تامقا بیزقه بولسون بوران، کؤک بؤرو بولسون قیل اوران. تمیر چیدالار بول اورمان، آو ییرده ییری‌سین قولان. تاکی تالوی، تاکی مورجن، کون توق بولقیل، کؤک قوریقان.

سونرا هر طرفه ائلچی گؤندریب خبر چاتدیردی کی، من هر یئرین، هاممین هؤکمداری- کاغانی اولدوم. (یعنی تانری اؤزو منی کاغان سئچ‌دی. کیم منه باش ایسه، هدییه‌لرینی قبول ائدیب، اونو اؤزومه دوست سایارام، کیم اطاعت ائتمه‌سه، دوشمه‌ن‌دیر، اوستونه قوشون چکره‌م). ساغ طرف‌ده هؤکمدارلیق ائد‌ن آلتون کاغان باش ایدی، اطاعت ائل‌دی، سول طرف‌ده هؤکمدارلیق ائد‌ن اوروم کاغان بویون قاچیردی. اوغوز کاغان هیرسلنیب اونون اوزرینه یئری‌دی. قوشون بوز داغینین اتیین‌ده دایان‌دی. سحر آچیلان‌دا اوغوز کاغانین چادیرینا بیر ایشیق دوش‌دو. ایچین‌دن بؤیوک بیر ائرکک گؤی قورد (بوز قورد) چیخیب "ائی اوغوز، منیم آرخامجا گل" دئدی. اوغوز کاغان قوشونو ایله قوردون آرخاسینجا گئت‌دی، ایتیل چایینا چات‌دی. اوروم کاغان ایله ووروشوب قوشونونو یئن‌دی، کاغان قاچ‌دی. اوغوز کاغان اونون اؤلکه‌سینی اله کئچیردی. اوغوز کاغان یولونا داوام ائتدی. گؤی قورد یئنه ده اؤنده گئدیب یول گؤستریردی. کاغان هیند، تانقوت، سورییا و س. اؤلکه‌لری دؤیوشله آلدی، بیر سیرا یئرلره، ایگیدلره آد وئردی. اولوغ توروک آدلی بیر عقل‌لی قوجانی اؤزونه باش وزیر ائل‌دی. اولوغ توروک بیر گون یوخودا بیر قیزیل یای، اوچ گوموش اوخ گؤردو. یای گوندوغان‌دان گونباتانا قدر اوزانمیش‌دی، اوچ گوموش اوخسا شیمالا دوغرو اوچوردو. اولوغ توروک یوخوسونو اوغوز کاغانا دانیشیب "تانری بوتون دونیانی سنین تؤره‌مه‌لرینه باغیشلاسین" دئییر. اوغوز کاغان باش وزیرین سؤزونو بینیر. اوچ اوغلونو گونتوغانا، اوچونو ده گونباتانا گؤندریر. بؤیوک اوغوللار بیر قیزیل یای.
کیچیک اوغوللار اوچ گوموش اوخ تاپیب گتیریرلر... اوغوز کاغان یایی بؤیوک اوغلانلارینا، اوخلاری دا کیچیک اوغلانلارینا وئریر. قورولتای چاغیریب خالقلا یئییب- ایچیب مسلهتلشدیک‌دن سونرا اؤلکه‌سینی اوغوللاری آراسین‌دا بؤلوش‌دوردو. و اونلارا:

آی اوغوللار، کؤپ من آشدوم، اوروشقولار کؤپ من گؤردوم. چیدا بیله اوغ کؤپ من آتدوم، آیغیر بیرله کؤپ یورودوم، دوشمانلاریمنی ایقلاقوردوم، دوستلارومنی من کولتوردوم، کؤک تئنقریقه من اؤتدیم... سنلرقه بیره مئن یوردوم،- دئدی.