بو گون آذربایجان دراماتورگییاسین‌دا رئالیزمین بانی‌سی ساییلان، جمهوریتیمیزین قوروجولارین‌دان اولان محمد امین رسولزادنین «آذربایجانین اون ان بؤیوک شخصیتلرین‌دن و سیمگه‌لرین‌دن بیری»آدلاندیردیغی جعفر جببارلینین دوغوم گونودور.

Kult.az خبر وئریر کی، ۱۸۹۹-جو ایل مارت آیینین ۲۲-ده باکی قوبئرنییاسینین خیزی کندین‌ده کاسیب کؤمورجو عائله‌سین‌ده دونیایا گؤز آچان جعفر کیچیک یاشلارین‌دا آتاسینی ایتیرمیش، عائله‌سی ایله برابر باکییا کؤچور.

اول ملا یانین‌دا اوخویان جعفر سونرادان باکی‌داکی تورک-روس (روس-تاتار) مکتبینه گئدیر. تحصیلینی ۳ سای‌لی آلی ایبتیدایی مکتب‌ده داوام ائتدیره‌ن جعفر ایلک پیئسینی ده اورادا قلمه آلیر. قیسا واخت‌دا دراماتورق کیمی تانینیب شهرت قازانیر. اثرلری مختلیف تئاتر تروپپالارین‌دا صحنه‌یه قویولان جعفر جاببارلی تحصیلینی داوام ائتدیریر. اؤنجه باکی پولیتکنیک تئکنیکومون‌دا، سونرا ایسه آزروایجان دولت اونیورسیتتینین شرق و طب فاکولته‌لرینده محاضیره‌لر دینله‌ییب، باکی تئاتر مرتبینده صرف صحنه تحصیلینه ییلنیب.

بدیعی یارادیجیلیغا «باهار» شعیری ایله باشلایان صنعتکارین یازدیغی ایلک درام اثری «وفالی سرییه»، یاخود «گؤز یاشی ایجین‌ده گولوش»دور. بوندان سونرا آرد-آردا یازدیغی بیر بیرین‌دن قیمتلی اثرلری ایله آذربایجان ادبیاتین‌دا اوزولونماز ایز بوراخیب.

اونون «سولغون چیچکلر»، «نصرالدین شاه»، «ترابلیس محاربه‌سی»، «آیدین»، «اوقتای ائلوغلو»، «اود گلینی»، «دیلبر»، «سئویل» و ب. اثرلری دراماتورگییامیزین شاه اثرلریندن ساییلیر.

جعفر جببارلی تئاترا بؤیوک اؤنم وئریردی و باشلیجا رولونو خالقا خیدمتده گؤروردو. بوتون حیات و یارادیجی‌لیغینی دئمک اولار کی، تئاترا حصر ائتمه‌سینه باخمایاراق دراماتورق اینجه‌صنعتین واجیب قوللاریندان اولان کینویا دا بؤیوک اهمیت وئریردی. او، آذربایجان میللی کینوسونون یارانماسی و اینکیشافی اوجون الین‌دن گلنی اسیرگه‌مه‌ییب. اونون سناریسی اوزره ۱۹۲۹-جو ایلده جکیله‌ن «سئویل» فیلمی آذربایجان کینئماتوگراف‌چیلارینین قادین حقوق‌سوزلوغو و اسارتینه ایلک اعتراض سسی ایدی.

گرگین ایش رژیمینده ایشله‌یه‌ن صنعتکار ۱۹۳۴-جو ایلین سونون‌دا، دکابرین ۳۱-ده وفات ائدیب.