بو گون آذربایجان تئاتر و رژیسورلوق صنعتینین اونودولماز نماینده‌لریندن اولان، خالق آرتیستی صمد مؤلوینین دوغوم گونودور.

Kult.az خبر وئریر کی، اصل آدی عبدالصمد رضالی اولان آکتیور ۱۹۰۰-جو ایلین فورالین ۲۰-ده تبریزده یوخسول بیر عائله‌ده دوغولوب.

آتاسی میرزا محمد تبریزده خالچاچی‌لیق کارخاناسیندا ایشله‌ییب. ۸ یاشیندا آتاسینی ایتیرن بالاجا عبدالصمد تحصیل آلماق اوچون ملا مکتبینه گئدیر. اما یاخشی سسه مالیک اولماسی و ۱۹۱۰-جو ایللرده آذربایجان تئاترینین آکتیورلارینین تبریزه گاسترول سفرلری و بو زامان ایزلدیی تماشالار اونون اینجه‌صنعته ماراغینی آرتیریر.

بیر دفعه تبریزده گاسترولدا اولان بؤیوک صنعتکاریمیز صیدقی روح‌الله نریمانووون «نادر شاه» فاجعه‌سینی بورادا تماشایا قویور. طبیعی کی، او زامان آذربایجانین دیگر شهرلرینده اولدوغو کیمی تبریزده ده «نادر شاه»داکی گلجهان رولونو اویناماق اوچون قادین آکتریسا یوخ ایدی. بو زامان صیدقی روح‌الله بو رولو "روشدیه" مکتبینده تحصیل آلان گنج طلبه صمد مولوییه تاپشیریر. صدقی روح‌الله-ین اؤزونون ده یازدیغی کیمی «...او، هئچ ندن چکینمه‌دن چوخ بؤیوک بیر جسارتله گلجهان رولونو ایفا ائتدی".

بون‌دان سونرا گنج عبدالصمد اصلا ناخچیوان‌دان اولان بؤیوکخان ناخچیوانلینین یاراتدیغی تبریز تئاتریندا روللار اویناییر. بئله کی، ایلک دفعه همین واخت تبریزده تماشایا قویولان «اؤلولر" اثرینده شیخ نصروللا اوبرازینی یاشینا و تجروبه‌سینه اویغون اولمایان اوستالیقلا یارادیر. بو اوبرازدا چوخ یاخشی اوینایان آکتیور نخچیواندان اولان صنعتکارلارین دقتینی چکیر. صنعتکار دوستلاری سووت حاکمیتی ایللرینده اونون ناخچیوانا گلمه‌سینی تشکیل ائدیرلر. بورادا ایسه عبدالصمد رضالی صنعت عالمینده صمد مولوی کیمی تانینیر.

اونون رژیسورلوق باجاریغی و گؤزل سسه مالیک اولماسی ناخچیوان تئاتریندا همین ایللرده اوپرا و اوپرتتالارین دا صحنه‌نلشدیریلمه‌سینه امکان یارادیر. صنعتکار تئاتردا اوزییر حاجی‌بیلینین "لیلی و مجنون"، "اصلی و کرم"، "شاه عباس و خورشید بانو" اوپرالارینی اوغورلا تاماشایا قویور.

۱۹۲۴-جو ایلده‌ن ۱۹۲۵-جی ایلین سنتیابرینادک اوراداکی آذربایجان تئاترین‌دا حسین جاویدین "ایبلیس"، "شیخ سنان"، جابارلینین "آیدین"، نریمانووون "نادیر شاه"، او. حاجیبیلینین "لیلی و مجنون"، "ار و آرواد"، "آرشین مال آلان" پیسلرینی تماشایا قویور.

۱۹۲۲-جی ایلده تورک درام تئاتری، سونرا ایسه نخچیوان دولت درام تئاتری ایستاتوسونو آلان بو صنعت اوجاغیندا رژیسور کیمی بیر-بیریندن ماراقلی تماشالارا قورولوش وئریر. او، جعفر جبارلینین "اود گلینی"، "۱۹۰۵-جی ایلده"، حسین جاویدین "شئخ سنان"، "ایبلیس"، "شیدا"، "اوچوروم"، "دلی کنیاز"، آخوندووون "حاجی قارا"، شمس‌الدین سامینین "دمیرچی گاوه"، گورجو یازیچی‌سی شانشیاشویلینین "آنزور"، شکسپیرین "حاملت"، "اوتللو" و س. پیسلرینی موفقیتله تماشایا قویماقلا یاناشی اؤزو ده آیری-آیری روللاردا چیخیش ائدیب.

۱۹۶۰-جی ایلده ایسه "آذربایجان اس.اس.ار خالق آرتیستی" فخری آدینی آلیر.

یاریم عصره یاخین بیر دورده ۲۳۰-دان چوخ مختلیف کاراکترلی اوبراز یارادان بؤیوک صنعت فداییسی، رژیسور و آکتیور ۱۹۶۲-جی ایل فورال آیینین ۳-ده نخچیوان‌دا وفات ائدیب.