همچینین بو اثر رئال آذربایجانلی و ارمنی کاراکترینی دقیق افاده ائتمهسی باخیمیندان فرقلنیر.
«اؤگی آنا» فیلمیندن یاخشی تانیدیغیمیز اسماییل بؤیویوب و ایندی وطنی قوروماق اوچون اؤن جبههدهدیر. «فریاد»ین قهرمانی اسماعیل هم «کندیمیز» اوخویان، هم ده باجیسیندان اؤترو داغلارا ایتبورنو چیچیی ییغماغا گئدیب، حیاتینی تهلوکهیه آتان آدامدیر.
یعنی ارکؤیون، همچینین صاف اورکلی اسماعیل محض بئله آداما، «فریاد»دا قیز اوشاغینا ایشگهنجه وئردیی اوچون ارمنینین اوستونه قورخمادان شیغییان، قیصاصینی آلمادان دینجلمهیهن غیرتلی کیشییه چئوریلمهلی ایدی.
«فریاد» فیلمینین چکیلیشلری زامانی جیحون میرزیئو بیر نئچه دفعه تهلوکه ایله اوز-اوزه قالیب. فیلمده بالاجا قیزین زورلانما خبرینی ائشیدن اسماعیل بونو کیمین ائلدیینی باشا دوشور. سنگرین آراسی ایله قاچا-قاچا گلیب ارمنیلرین موقعینه چاتیر و تجاوزکاری اؤلدورور. بو صحنهده آکتیور آغاجلارین آراسیندا قاچدیغی یئرده بیردن ییخیلیر. جیحونون ییخیلدیغی یئرده بیر آغاجدان او بیری آغاجا چوخ نازیک، اما پولاددان بیر سیم چکیلیبمیش. آکتیور اونو سون آندا گؤروب، علی ایله ایتهلهییب ییخیلماسایدی، ایپ اونون بوغازینی اوزردی.
فیلمده اسماعیلین حبسخانادا دؤیولمه صحنهسینین داها جانلی آلینماسی اوچون رژیسور آکتیور یولداشلاریندان خواهیش ائدیب کی، اونو دوغرودان دا دؤیسونلر، حتی لازیم گلسه، زده آلانا کیمی دؤیسونلر. فیلمده گولللنمیش، سویوقدان دونموش خوجالیلیلارین روللاریندا ائله خوجالی ساکینلری چکیلیب.
«فریاد»ین رژیسورو و باش رولون (اسماعیل) ایفاچیسی مرحوم جیحون میرزیئو ۱۹۹۳-جو ایلین مارتین ۵-ده چکیلیشدن سونراکی حاضرلیق دؤنهمینده دونیاسینی دییشیب. همین گون جیحون میرزیئو «فریاد» فیلمی حاقیندا حاضرلاناجاق تلویزییا پروگرامیندا اشتراک ائتمهلی ایدی. اما ایکینجی دفعه کئچیردیی اینسولت اونون اؤلومونه سبب اولور.
آکتیور نه فیلمین سونونو، نه ۴۷ یاشینی گؤرور، نه ده اؤز قابیلیتینی «فریاد»این تیمثالیندا سیر ائده بیلیر. اونون اؤلوموندن سونرا رژیسور دوستو و فیلمین سناری مؤلفی واقیف مصطفییئو مونتاژ و سسلندیرمهنی اؤز عهدهسینه گؤتورور.