تانینمیش ژوورنالیست و میللی-مدنی فعال گونئی آذربایجانین اجتماعی حقوقلارینی طلب ائتمک سوچو ایله ایللر بویو حاکمیت طرفین‌دن حبس حیاتی یاشایان، تضییقلره معروض قالان حبیب ساسانییانین (یاکاموز) گونئی آذربایجانین آنا دیلی پروبلمی ایله باغلی مصاحیبه‌سینی Axar.az اوخوجولارینا تقدیم ائدیر:

ایران‌دا آنا دیلین‌ده تحصیلین اولماماسینین اساس سببلرینی نده گؤرورسونوز؟

آنجاق و آنجاق تورک دونیاسینین بیرلشمه و گوجله‌نمه قورخوسو، ایچری و دیشاری قوه‌لرین جانینا اوشوتمه سالیب.

بونو بیلمه‌یه نه وار، گونئی آذربایجان تورک دونیاسینین ان اؤنملی قیریلمیش حالقاسیدیر.

گونئی آذربایجان‌دا کوتله‌نین آنا دیلین‌ده تحصیل آلماسینین اؤنمی نده‌دیر؟

تکجه گونئی آذربایجان یوخ، هر بیر اولوس آنا دیلین‌ده تحصیل آلماسالار، میللی کیملیکلرینی ایتیریب گئج-تئز، حاکم دیللرین قازانین‌دا اریمه‌لیدیر.

گونئی آذربایجان‌دا میللی-مدنی فعاللارین آنا دیلی اوغروندا موباریزه‌لری هانسی سوییه‌ده‌دیر؟

هر بیر مدنی-میللی مباریزین ان بیرینجی و اؤنملی موجادیله‌لری، آنا دیلیمیزین بیرینجی صینیفلردن عالی تحصیل اوجاقلارینا قدر رسمی تحصیل دیلی اولمالیدیر.

دئمک عدالتلی بیر یاشامی الده ائتمیین یولو آنا دیلیمیزین رسمی تحصیلین‌دن کئچیر.

ایران حاکمیتینین گونئیده آنا دیلینده تحصیل ایسته‌یه‌ن میللی-مدنی فعاللارا قارشی آپاردیغی تضییقلرین اساس سببلری؟

بیرینجی سوالدا بونا کونکرت جواب وئریلمیینه باخمایاراق، بو ایستک الده ائدیلرسه، مرکزی حاکمیت داها یالان و ساختا تاریخلره دایاناراق هئچ بیر خالقی کؤله و ایستیثمار ائده بیلمز. میللی وارلیغینی و کیملیینی دوچونه‌ن میللت، اؤزگورلویون دادینی دادمیش اولور.

اونا گؤره، میللی مدنی مباریزلریمیز، کوتله‌نی معاریفلندیرمکدن یانا، امنیت قوه‌لری طرفین‌دن دایما باسقیدادیرلار.

بو حال‌دا آذربایجان دؤولتینین مئدیا نماینده‌لری گونئی‌لیلره نئجه دستک اولا بیلر؟

قوزئی آذربایجانین مئدیاسی، گونئی‌لی یازارلار، شاعرلر، تدقیقات‌چیلار و دیلچیلرین اثرلرینی مدنی اوجاقلاردا سسلندیریب ییه دورمالیدیرلار. اؤزللیکله اونلارا فخری دیپلملار وئرمکله، معنوی اورک-دایاق اولا بیلرلر.