موستقیل قازاخ متخصص، بلوگر نورلان سالتایئو قازاخستان‌دا کئچیریله‌ن سئچکیلر و اؤلکه‌نین خاریجی سیاستین‌ده‌کی مومکون دییشیکلیکلر حاق‌دا یئنی‌چاغ-آ موصاحیبه وئریب.

آزنیوز. تی وی بو موصاحیبه‌نی تقدیم ائدیر:

– سیزجه گله‌جک‌ده قازاخستانین خاریجی سیاستین‌ده هان‌سی دییشیکلیکلری گؤزله‌مک اولار؟

– دوشونوره‌م کی، جدی دییشیکلیکلر گؤزلنیلمیر، چونکی توکایئو نازاربایئوین پرزیدنت‌لیگی دؤنه‌مینده اؤلکه‌نین خاریجی ایشلری ناظری وظیفه‌سینده چالیشیب. اساس اودور کی، قازاخستان‌دا دکولونیزاسییا باشا چاتماییب. بونون سببی اودور کی، دونیادا ان اوزون قورو سرحد قازاخستانلا روسییا آراسین‌دادیر و اهالیمیزین ۳۰% روسلاردان عبارت‌دیر. تخمیناً ۲۵ ایل اول روسلار اهالیمیزین ۶۰%-نی تشکیل ائدیردی. احتیاط‌لی سیاست نتیجه‌سین‌ده روسییا اوکراینا، مولدووا و گورجوستان‌داکی کیمی، قازاخستانین شیمال-شرقین‌ده محاربه آچماغا ایمکان تاپمادی. لاکین بونا گؤره قازاخستان گؤمروک بیرلیینه داخیل اولماقلا سوورنلیینین بیر حیصه‌سینی ایتیرمک مجبوریتینده قالدی.

– قازاخستانین آذربایجان و تورکییه ایله محکم سیاسی و اقتصادی مناسیبتلری وار. نازاربایئوین دؤنه‌مینده بو مناسیبتلر اینکیشاف ائدیب.

– خئیر، نازاربایئو دؤنه‌مین‌ده بو مناسیبتلر اینکیشاف ائتمه‌ییب – بو بیر پروپاقان‌دا محصولودور. عکسینه، اینکیشاف روسییا ایستیقامتین‌ده اولوب: گمروک قانون وئریجیلیینین اونیفیکاسییاسی، محصوللارین، ایشچی قوه‌سینین و خیدمتلرین روسییا، بلاروس و ارمنیستانا آزاد نقلی و س..

– توکایئوین دؤنه‌مینده قازاخستانین بیزیم اؤلکه‌لره قارشی مناسیبتلری نئجه اولاجاق؟

– آذربایجان و تورکییه ایله باغلی قازاخستانین سیاستی دییشمه‌یه‌جک.

– سیزجه تورک دونیاسینین بیر اولوب حربی-سیاسی آلیانسا چئوریلمک پوتنسیالی وار می؟

– تورک دونیاسینین بیرلشمه‌سی تاریخی ضرورتدیر ، چونکی روسییا و چین طرف‌دن تورکلره و تورک دؤولتلرینه قارشی گوج، اقتصادی و مدنی تضییقلر شرایطین‌ده، احتیمال وار کی، بیر نئچه اونیل‌لیکدن سونرا تاتارلار، باشقیردلار، اویغورلار و س. یوخ اولماق اوزره اولان خالقلارین سیراسینا داخیل اولاجاقلار. سونرا ایسه نؤوبه قازاخلارا و قیرغیزلارا گله‌جک. حربی-سیاسی‌دن اؤنجه، اقتصادی بیرلیک یاراتماق لازیم‌دیر. لاکین بونون اوچون جنوبی آذربایجان‌دان – تبریزدن و اردبیل‌دن لوجیستیک یول آچماق لازیم‌دیر. بئله‌لیکله، ماللارین ایستانبول‌دان مرکزی آسییایا نقلیاتی، مسکودان قات-قات اوجوز باشا گله‌جک. بو تق‌دیرده، تورکلر عینی تاریخه و تفککوره مالیک ۲۰۰ میلیون‌دان چوخ ایستئهلاک‌چی‌دان عبارت واهید تورک بازاری یاراداجاق. واهید لوقیستیک سیستئم هم ده، ایده‌آل‌دا کیپردن شیمال-بوزلو اوکیانادک، رئال‌دا ایسه ایستانبول‌دان آلتایادک آراسی کسیلمه‌یه‌ن بیر تورک قورشاغی‌دیر. تورک دؤولتلرینین اوردولارینین قارشی‌سین‌دا سرحد مانعه‌سی قالمادیق‌دا، هئچ بیر اؤلکه جزاسیز اولاراق تورکلره ظلم ائده بیلمه‌یه‌جک.