تورکییه‌ده فعالیته باشلایان گونئی آذربایجان رادیوسو «باراما رادیو»نون تاسیس‌چی‌سی آزریار دانیشورین Axar.az-آ مصاحیبه‌سی:

- «باراما رادیو»نون تاسیس‌چی‌سی اولاراق اؤزونوز حاقین‌دا معلومات وئرردینیز…

- من، آزریار دانیشور ۱۹۷۱-جی ایلده تبریزده دوغولموشام. میللی، مده‌نی فعال، شاعر، یازار، یئری گلن‌ده آپاریجی، همچینین، سندلی فیلم مؤلفییه‌م. قیراعتچی کیمی ده تانینیرام. البته، وطنیم اوچون لازیم اولسا، یئنی ساحه‌لرده ده فاللیت گؤسترمکدن چکینمره‌م، هر زامان اؤیره‌نمه‌یه ایستکلی و هوسلییه‌م.

- «باراما رادیو» نه زامان‌دان فعالیت گؤستریر و هان‌سی آمالی قارشی‌سینا هدف قویوب؟

- «باراما رادیو» اؤزومو تانییان‌دان آرزوسون‌دا اولدوغوم و قورماق ایستدییم بیر ایش ایدی. ۱۹۴۵-۴۶-جی ایللرده - گونئی آذربایجان میللی حکومتینین دؤنه‌مین‌ده تبریزین ایلک میللی رادیوسو قورولوب. تأسف کی، تورک دوشمه‌نی اولان پهلوی رئژی‌می طرفین‌دن بیر ایل کئچممیش فعالیتینه سون قویول‌دو. همین آجی خاطره‌یه کؤکلنیب بو بوش یئرین دولدورولماسینی آرزو ائتمیشم. قیسمت اولدو، ۲۰۲۲-جی ایلین دکابر آیینین ۵-ده تورکییه‌نین اسکیشهرینده فعالیته باشلادیق. گونئی آذربایجانین آزادلیق هارایی اولاراق خالقیمیزین سسینی دونیایا چات‌دیرماق ایستدیک. همچینین، الده ائده بیلدییمیز مختلیف مؤوضولاری گونئی آذربایجانلیلارا چاتدیرماق، میللی روحوموزون دیرچلیشی اوچون لازیم اولان هر جور مدنی، سنتسل، ادبی، میللی و سیاسی سس‌لی ماتریاللاری یاییملاماقدادیر.

- بئله بیر رادیونون تورکییه‌ده آچیلماسی هانسی ضرورتدن ایر‌لی گلیردی؟

- منیم اوچون مکانین فرقی یوخ ایدی. الیم‌دن گلن فعالیتی گئرشکلشدیرمک هر شئی‌دن اؤنملی‌دیر. لاکین دوروموموزدان دا آسیلی اولاراق، ۱۰ ایلده‌ن چوخدور کی، قارداش اؤلکه تورکییه‌ده عائله‌مله بیرگه یاشاییرام. تورکییه ده بیزه وطن ساییلیر. من ده بو معنوی امکانی بئله دیرلندیرمیشم.

- رادیو دوشوندویونوز کیمی گونئی‌لیلرین سسی اولا بیلدیمی؟

- هله‌لیک، رادیو فعالیتینه یئنی باشلادیغی اوچون بونونلا باغلی بیر سؤز دئیه بیلمره‌م. آنجاق بوتون روحوملا اینانیرام کی، گونئی آذربایجانین آزادلیق سسی اولماغا دوغرو دورمادان آددیملایاجاق. اصلین‌ده، «باراما رادیو» اجتماعی شبکه‌لر اوزریندن یاییم‌لانیر. اگر دستک وئرن اولارسا، رادیونون فعالیتینی گئنیشلندیرمک اوچون هر امکانی دیرلندیرمه‌یه قرارلییام.

- هانسی پروبلم و مؤوضولارا توخونورسونوز؟

- بو گون گونئی آذربایجانین اوریینی هان‌سی درد آغریدیرسا، او دا رادیوموزون اساس مؤوضوسودور. یئری گلنده باجی-قارداشلاریمیزین اومیدینین آرتماسی اوچون الیمیزدن گلدیی قدر مؤوضولاری تاپیب، پروگراملاشدیرماغا چالیشیریق. منیم اوچون آذربایجانی سادته گؤتوره بیله‌جک هر مؤوضو واجیب و دیرلیدیر.

- هانسی چتین‌لیکلرینیز وار؟

- «باراما رادیو» منیم شخصی محدود امکانلاریملا یارانیب. بیر-ایکی کؤنوللو عزیز قارداشیم دا بو یولدا بعضی ایمکانلاری الده ائده بیلمییم اوچون منه دستک وئریرلر. آنجاق مکان، یایین تجهیزاتی، تکنیکی دستک کیمی امکانلاردان چتینلیک چکیرم.

- پرسپکتیوده هانسی پلانلارینیز وار؟

- گله‌جک پلانلاریمدا مستقیل آذربایجان اولاراق تبریزده میللی رادیوموزو تاسیس ائتمک وار. آنجاق او گونه قدر آذربایجانین ان تأثیرلی، میللی و فاووری رادیولاریندان بیری اولماغی، تورک دونیاسینین تانیدیغی و سئودیی بیر رادیو کیمی مشهورلاشماغی پلانلاشدیریریق.

- «باراما رادیو»نون آدی حاقیندا دا دانیشاردینیز…

- «باراما» نه دئمکدیر؟ باراما – تیرتیل آدییلا تانیدیغیمیز بیر جانلینین، آرزو ائتدیی بؤیوک بیر دییشیم اوچون اؤز اطرافینا هؤردویو بیر اینزیوا موحیطینین آدی‌دیر. او، بؤیوک بیر اینکیشاف و دؤنوش ایچین‌ده‌دیر. حیاتینین ان بؤیوک مرحله‌سیندن کئچیر. تیرتیل بارامانین ایچین‌ده سس‌سیز و اؤلو کیمی حرکتسیزدیر. بوتون مجادیله آنجاق اونون اؤز ایچ دونیاسیندا باش وئریر. اؤلوم-قالیم ساواشیندایکه‌ن باشقالاری اونون ایپکدن هؤردویو بارامایا گؤز تیکیبلر. ایلک فورصتده باراماسینی سؤکوب ایپک ساپینا صاحب اولماق نیتینددیرلر. اما کیمسه او بارامایا دیمه‌مه‌لیدیر، یوخسا تیرتیل اؤز بؤیوک آرزوسونا یئتیشمدن اؤله بیلر. تیرتیل تله‌سه ده بیلمز! او، بؤیوک اویانیش و دیریلیش گونونو صبیرله، اؤز ایچینی یئییب گؤزله‌مه‌لی‌دیر! اونا بو دورومدا توختاقلیق وئرن تک شئی گله‌جک گونون خیالیدیر. چونکی او گون ائله گؤزلدیر کی، چکیلن هر آغرییا دیر!

قارانلیق گئجه‌لرده اولدوزلار پاریلداسا دا، تیرتیل او محتشم گؤرونتولری گؤرمکدن محرومدور. بیر گون قارانلیق گئجه‌نین ده سونو یاخینلاشیر.

نهایت، آیدین شفق‌لی او سحر گلیب چاتیر. بارامادا یاواش-یاواش بیر تیترشیملی حرکتلر حس اولونور، بوتون گؤزلر اونون اوزرینده‌دیر. بارامانین ایچیندن سورونگن دئییل، کیمسه‌نین تانیمادیغی بیر قانادلی اورتایا چیخیر. بو دییشیکلییه حیرت ائتمه‌مک ممکن دئییلدیر، بو، بیر معجزه‌دیر! بس هانی او خور گؤرونه‌ن گوجسوز سورونگن؟! آرتیق باخان گؤزلر، اؤزگور و محتشم گؤزللییه صاحب اولان قانادلی و اوچا بیلن یئنی وارلیغین اوزونه دیکیلیب دوروب. اؤزگورلویون، قانادلارین، اوچوشون مبارک اولسون.

باراما - بو گون گونئی آذربایجان تورک میللتینین یاشادیغی قاپالی دورومودور. قانادلی کپنک ایسه یاخین گله‌جک‌ده واراجاغی آزادلیق، میللی اقتدار و سعادتی‌دیر. «باراما رادیو» او میللتین، سادتلی گله‌جه‌یه اینانان آزادلیق سسی‌دیر.