«فوربس» ژورنالی ۲۰۱۶-جی ایلده اثرلرینه گؤره ان یوکسک گلیر الده ائد‌ن قادین یازیچیلارین آدلارینی آچیقلاییب.

کولت. آذ خبر وئریر کی، ۲۰۱۶-جی ایلین نتیجه‌سینه اساساً، دونیا اوزره ان یوکسک قازانجا مالیک مؤلفلرین سیاهیسیندا ۱۷ یئردن ۶-نی قادینلار توتوب. میلیونلارلا نوسخه ساتیلان «قاتارداکی قیز» کیتابینین مؤلفی پولا هوکینس ان وارلی یازیچی قادینلار سیاهیسینا داخیل اولوب. او، ۱۰ میلیون دوللار قازاناراق ریتینگده ۵-جی یئرده قرارلاشیب.

ان وارلی یازیچی قادینلارین ریتینگینه ایسه «هاری پوتر» بارهده اثرلرین مؤلفی جوان روولینگ باشچیلیق ائدیر. سهرلی دونیا حاقدا کیتابلار اؤز مؤلفینه کئچن ایل ۱۹ میلیون دوللار اولماقلا ایستابیل گلیر گتیرمکده داوام ائدیر. «قاریشیق» ریتینگده ایسه روولینگ اوچونجو یری توتور.

قادینلارین سیاهیسیندا ایکینجی و اوچونجو یئرین صاحبلری مشهور رومانچیلار، هر بیری ۱۵ میلیون دوللار قازانماغا ناعل اولان نورا روبئرتس و دانیئلا ایستیلدیر.

مشهور «بوزون ۵۰ چالاری» کیتابینین مؤلفی، عینی آدلی فیلمین چکیلیشیندن سونرا دونیا شهرتی قازانان اریکا لیونارد جیمس ۱۴ میلیون دوللارلا دؤردونجو سیرادا یئر آلیر.