ایت دیرسیی گؤز قاپاغینداکی کیرپیک کیسه‌سینین و یا پی وزی‌سینین کسکین ایلتیهابیدیر، ایلکین اولاراق گؤز قاپاغینین کناریندا آغریلی نقطه‌نین عمله گلمه‌سی ایله باشلاییر، سونرا اونون اطرافیندا شیشکینلیک و قیزارتی یارانیر، گؤز قاپاغی شیشیر. ایکی-اوچ گوندن سونرا همین ساحه‌ده ساری رنگلی ایرینلی "باشجیق" عمله گلیر، دئشیلندن سونرا ایچینده‌کی چیرک خاریج اولور. گؤز قاپاغیندا عینی زاماندا بیر نئچه ایت دیرسیینین عمله گلیب بیرلشمه‌سی باش وئره‌نده خسته‌نین عمومی وضعیتی آغیرلاشیر، تمپراتورون یوکسلمه‌سی، چنه آلتی و قولاق آلتی لیمفا وزیلرینین بؤیومه‌سی کیمی علامتلر یارانیر.

ایتدیرسیی کئچیب گئتمه‌ینده گؤز قاپاغینین ایچریسین‌ده کیچیک شیش کیمی قالاندا اونا خالازیون دئییلیر. خالازیون آغری وئرمیر، لاکین کوسمتیک قصورا گتیریب چیخاریر و چتینلیکله معالیجه اولونور.

آخار. آذ خبر وئریر کی، ایتدیرسیی چیخارکن بیر نئچه ساده اصوللا اونون قارشیسینی آلماق اولار. مثلاً، سوغان، ساریمساق، قوز یارپاغی و یا گول سویو گؤزه دیمه‌مک شرطی ایله ایتدیرسیی چیخان ناحییه‌یه چکیلیر. چوودار اونو، زیتون یاغی و ساریمساق ازمه‌سی قاریشیغیندان عبارت خمیربنزر کوتله ایتدیرسیینی ساغالدیر. تزه دملنمیش قارا چایا پامبیق باتیراراق تامپون قویولور.

۲ چای قاشیغی پیغمبر چیچیی بیتکیسی یاخشی قاینانمیش ۱ ایستکان سودا دمله‌نیله‌رک ۱ ساعت ساخلانیلیر، آلینان چیخاریشدان گؤزه ایسلاتما قویولور.

۱ خؤرک قاشیغی اویودولموش گول دفنه توخومو آز میقداردا قاینار سو ایله قاریشدیریلیر و آلینان کوتله دؤرد-بئش قات تنظیفین اوزرینه قویولور. سویویاندان سونرا گؤزه ایسلاتما قویولور.

تنظیف پارچاسی گنگرچک یاغیندا ایسلادیلیر، گؤزه قویولاراق بیر گئجه ساخلانیلیر. بونو ایکی-اوچ دفعه تکرار اولونماسی ایت دیرسیینین ساغالماسی اوچون کیفایت ائدیر.

ازوای یارپاغی خیردا دوغرانیر، اوزرینه ۱ ایستکان سویوق سو تؤکه‌رک ۸ ساعت اوتاق تمپراتوروندا ساخلانیر و سوزولور. آلینان چیخاریشلا گونده ۲-۳ دفعه گؤزلره ۱۵ دقیقه ایسلاتما قویولور.

گولختمی چیچیی و ائوکالیپت یارپاغینین دمله‌مه‌لرینی ده ایتدیرسیی چیخان گؤزه قویماق اولار.