فعللرین بیر خصوصیتی ده اونلارین انکارلیق آنلامینا مالیک اولمالاریدیر. ایش و حرکتین ایجرا ائدیلدیینی گؤسترن فعللره تصدیق، ایجرا ائدیلمه مه سینی بیلدیرنلره ایسه اینکار فعلی دئییلیر.

انکارلیق آنلامینین علامتی "ما- مه " دیر کی، بلا واسطه، بوتون شکیلچیلردن اول، فعلین کؤکونه بیرلشیر.

انکارلیق علامتی وورغو آلتینا دوشمز، وورغولار اونلاردان قاباقکی هجالار دا اولار.

بو انکار شکیلچیلرینی فعللرده اسم و صفت دوزلدن "ما- مه" شکیلچیلری ایله قاریشدیرماق اولماز.

انکارلیق علامتی وورغو قبول ائتمه دیکلری حالدا، بو شکیلچیلر وورغو آلتینا دوشور.

دیلیمیزده انکارلیق علامتی بیلدیرن بیر ده "نه" باغلاییجیسی واردیر کی، تکجه فعل دئییل بوتون نطق حصه لریله ایشله نیر. بو باغلاییجی اینکارلیق و مختلیفلیک مضمونو یارادیر. مثلا: نه من نه ده سن، نه یازیر نه اوتورور..

دنیا دیللرینین هامیسیندا انکارلیق علامتی واردیر، لاکن اونلارین چوخوندا بو آنلامین علامتی فعلین اولینده اولور، هالبو کی، دیلیمیزده بو علامت فعللرین سونونا گلیر. لاکن دیلیمیزده کی "نه" باغلاییجیسی باشقا دیللرین اینکار علامتینه اویغوندور.

دیلیمیزین فعللریندن اول "نه" باغلاییجیسی ایشلندیکده، انکارلیق علامتی گلمز، اونا گؤره کی، "نه" اینکار علامتینی عوض ائدیر. مثال: نه ایچری گلیر، نه ده قویوب گئدیر... بو جمله نین معناسی حقیقتده بئله دیر. ایچری گلمیرو قویوب گئتمیر.

معاصیر ادبی دیلیمیزده بعضی ادیبلر طرفیندن هم "نه"، همده انکارلیق علامتی ایشله نیر. مثلا: نه اؤلمور، نه دیریلمیر. لاکن قید اولونمالیدیر کی، بو دوزگون دئییلدیر.

قید ائتمک لازیمدیر کی، ایکی انکار علامتی ، هم "نه- دئییل" ، همده "ما- مه" بیر جمله ده او زامان ایشله نه بیلر کی، ریاضیات کیمی، ایکی اینکار بیر تصدیق معناسی وئرسین.

بونلاردان علاوه دیلیمیزده "یوخ" کیمی منفیلیک مضمونو داشییان سوز ده واردیر کی، باشقا نطق حصه لرینده ایشله نیر