فعلین بو شکلی هم ایشین اجراسینین گرکلییینی، همده آرزو اولونماسینی بیلدیریر و ایکی جور اولور:

١.- ساده التزام آرزو شکلی: بو شکلین علامتی "آ- ه" دیر کی، فعلین کؤکونه قوشولور. فعل سسلی ایله قورتارسا، اونلارین آراسینا "ی" سس سیزی علاوه اولار. بو شکلین زامان علامتی اولماز، لاکن گلجیی بیلدیریر. مثلا: قاچ+آ+م= قاچام، گؤره م، بیلم، سورویه ک..

بو شکلین اینکار علامتی "ما-مه" دیر کی، بلاواسطه کؤکه قوشولار و ایکی سسلینی بیری-بیریندن آییرماق اوچون، اوندان سونرا "ی" سس سیزی ده گلر. مثلا: قاچ+ما+ی+آ+م= قاچمایام، گؤرمه یم..

٢.- مرکب التزام آرزو شکلی: بو شکلین علامتی "ایدی" دیر کی، "آ- ه" شکیلچیلریندن سونرا گلیر، اوزوده هم کامل، همده اختصارلا یازیلیر و کئچمیش زامانی بیلدیریر. فعلین بو شکلیندن اول "گرک" سؤزوده یازیلمالیدیر. مثلا: گرک قاچایدیم، گرک قاچایدینیز..بونلار حکایه شکلینده دیرلر. اینکاری "ما-مه" شکیلچیسیله دوزه لیر کی، کؤکه قوشولار. مثلا: گرک قاچمایایدیم..

هر ایکی التزام- آرزو شکلینین غیر شهودی فورماسی "ایمیش= میش" واسطه سیله دوزه لیر کی، "آ- ه " شکیلچیسیندن سونرا گلیر و فعلین اولینده "گرک" یازیلیر. مثال: گرک گله ایمیشیک.. انکاری "ما-مه" ایله دوزه لیر کی، فعلین بلاواسطه کؤکونه قوشولور. مثلا: گرک قاچما یاایمیشم

بونلار التزام- آرزو شکلینین روایت= غیر شهودی فورمودور.

فعلین بو شکلیندن اول، لازیم اولاندا، "کاش- کاش کی" سؤزلریندن بیری گله بیلیر. مثال: کاش گله ایدین، کاش گؤره م...