دیلیمیزده داواملی کئچمیشدن علاوه، بیر ده فعلین ائله بیر شکلی واردیر کی، ایشین کئچمیشده باشلانیب ایندی داوام ائتمه سینی بیلدیریر. ب. شکلین خصوصی علامتی "ماقدا- مکده" دیر کی، بلاواسطه فعلین کؤکونه قوشولار. بو شکلین ده ایکی فورماسی واردیر، اوندادا زامان شکیلچیسی اولماز.

١- ساده دوام شکلی: بو شکلین علامتی "ماقدا- مکده" دیر. بیتیشن شخص عوضلیکلری سسلیله باشلانارسا، آرالارینا "ی" سسسیزی ده یازیلیر. مثلا: اوخوماقدایام، گلمکده سن..

ساده دوام شکلینین اینکاری اولماز، اما نادیر حاللاردا ایشلننده "دئییل" سؤزوندن استفاده اولونار کی، "ماقدا-مکده" علامتیندن سونرا گلر. مثلا: یازماقدا دئییلم...

مرکب دوام شکلی: بو شکلین علامتی "ایدی" دن عبارتدیر کی،"ماقدا- مکده" شکیلچیسیندن سونرا گلیر، اؤزوده هم کامل، همده اختسارلا یازیلیر و کئچمیش زامانی بیلدیریر. مثلا: یازماقدا ایدیم..

دئمک بو شکیل دوام فورماسینین حکایه سیدیر. بونون هم قیسا، همده اوزون شکلینین غیر شهودیسی واردیر کی، روایت ساییلیر. مثاللار: یازماقدا ایدیم میش، یازماقدایدیم میش... گؤروندویو کیمی "میش" روایت علامتی یئری گلدیکده شخص سونلوقلاریندان سونرا دا ایشلنه بیلر.

بو شکلین ده اینکاریندا "دئییل" دن استفاده اولونور. مثلا: یازماقدا دئییل ایدیم..

"ایمیش-میش" واسطه سیله دوزه لن غیر شهودی هم کئچمیش زامانا دلالت ائدیر. همده روایت معناسی وئریر. مثال: یازماقدا امیشم..

داوام شکلینین غیر شهودیسینین اینکاری دا "دئییل" واسطه سیله دوزه لیر. مثال: یازماقدا دئییلمیش سینیز...

داوام شکلینده زامان شکیلچیسی اشتراک ائتمیر و یالنیز شخص سونلوقلاری اشتراک ائدیر.

دوام شکلینین ساده سینین عمومی فورمولو بئله دیر: فعلین کؤکو+ فورم شکیلچیسی+ شخص سونلوقلاری. یازماقدایدیم، گلمکده سن..

بوتون بو فعللر ایندیکی زامانی بیلدیریر. دوام شکلینین مرکبینین عمومی فورمولو بئله دیر: فعلین کؤکو+ فورم علامتی+ کؤمکچی فعل+ شخص سونلوقلاری.

"ایدی" کؤمکچی فعلی ایله یارانان داوام شکلی هم فعلی کئچمیش زامانا باغلاییر، همده حکایه مضمونو یارادیر. یازماقدایدیم، گلمکده ایدینیز...

"ایمیش" کؤمکچی فعلی ایله یارانان داوام شکلی هم فعلی کئچمیش زامانا باغلاییر، همده اوندا روایت معناسی یارادیر و عین زاماندا غیر شهودی اولور. یازماقدا ایمیشم...

فعلین داواملی شکلینده یوخاریدا وئریلن ایکی کؤمکچی فعلدن علاوه همده "ایسه" و یا اونون اختصاری "سا-سه" کؤمکچی فعلی ایشله نیر. بو کؤمکچی فعل یوخاریدا گؤستریلن هر اوچ دوام شکلی ایله ایشله نیر و هر اوچونده ایشین شرطله دوام ائتدییینی بیلدیریر.

ساده دوام شکلینده: یازماقدایامسا، ایشله مکده سینیزسه..

مرکب داواملی/ حکایت: اوخوماقدایمسه..

مرکب داواملی/ روایت-غیر شهودی/: اوخوماقدا ایمیشمسه، یازماقدا ایمیشمسه..

گؤروندویو کیمی بو سونونجو اوچ شکلین بیرینجیسی ایندیکی زامانی، او بیریلری ایسه کئچمیش زامانی بیلدیریر..