دیلیمیزده فعلین ایندیکی، کئچمیش و گلجک زامانلاریندان مختلف شکیلچی لر واسطه سیله صفت لر دوزلر. بو شکیلچی لری و اونلارین دوزلتدیک لری صفت لری کئچمیش ده صفت بؤلومونده یازمیشیق.

فعلی باغلامالار

"سولماز ایچری گیریب سلام وئردی" جمله سینده "سلام وئردی" فعلی شهودی کئچمیشین اوچونجو شخص تکینی بیلدیریر. اما "ایچری گیریب" فعلینده نه زمان ، نه شخص، نه نوع و نه ده فعل شکیللری علامتی واردیر.بیز ایندییه قدر فعللرده بو معنادا بئله بیر شکیل چی یه راست گلمه میشدیک. دئمک " ایچری گیریب" ده فعلین بیر خصوصی نوعودور. بورادا "سلام وئردی" جمله نین اساس فعلیدیر. اما "ایچری گیریب" فعلی اساس فعلین اجراسی اوچون بیر مقدمه و حاضرلیقدیر. بئله فعللرین نوعو، شخصی، زمانی و شکلی جمله نین اساس فعلیندن معلوم اولور. یعنی بورادا "سلام وئردی" فعلی معلوم نوع، اوچونجو شخصین تکی، کئچمیش شهودی و خبر شکلینده دیر. بونا گؤره ده "ایچری گیریب" فعلینین ده زمانی کئچمیش شهودی، اوچونجو شخصین تکی، نوعو معلوم و شکلی خبر شکلیدیر. بو جور فعللره "فعلی باغلاما" دئییلیر.