بو شکیلچیلرله ائله فعلی باغلامالار دوزه لیر کی، اونلار باش وئرمیش ایکی ایشین آراسینداکی زامان فاصله سینی بیلدیریر. مثلا "وطنه قاییدالی اوزوم گولمه میشدیر" جمله سینده " قاییدالی" فعلی باغلاما وطنه قاییداندان بو گونه قدر کی فاصله نی بیلدیریر.

بو فعلی باغلامالار بعضا ساده گئنیش جمله ده فعلی باغلاما ترکیبی یارادیر و جمله نین مرکب زامان ظرفی اولور. مثلا " سیزین یئرینیزه قوناق گله لی حالیم دوزلمیشدیر." جمله سینده" سیزین یئرینیزه قوناق گله لی" سؤزلری بیرلیکده جمله نین مرکب زامان ظرفیدیر.

مادان٢

بو شکیلچیلر فعلین اینکار علامتی "ما- مه" ایله زامان بیلدیرن "دان- ده ن" شکیلچیلریندن دوزه لمیش و اساسا زامان و قسما حال- وضعیت بیلدیریر. بو فعلی باغلامالار جمله نین اساس فعلیندن اول بیر ایشین حتما باش وئرمه لی اولدوغونو بیلدیریر. مثاللار:

گلمه دن اول تلفن ائت. یاغمادان گورولداما. اوشاق یاغیش یاغماسینا اهمیت وئرمه دن مکتبه گئتدی.

دئمک بونلارین تصدیقی اولماز. بو فعلی باغلامالاردا جمله داخیلینده ظرف رولو اوینویور. مثلا: گؤزله نیلمه دن هاوا برک توتولدو و یاغیش یاغدی. بو فعلی باغلامالار ساده جمله ده فعلی باغلاما ترکیبی یارادیر و جمله نین مرکب زامان ظرفی اولور. مثلا: "هاوا آچیلمادان اول یولا حاضیرلاشدیم" جمله سینده "هاوا آچیلمادان اول" سؤزلری فعلی باغلاما ترکیبی و جمله نین مرکب زامان ظرفیدیر.