بیر کؤک و بیر شکیلچیدن عمله گلن ظرفلره دوزلتمه ظرفلر دئییلیر. بو شکیلچیلرین مهملری بونلاردیر:

١- ساده طرزی حرکت ظرفلرینه "دان-دن" شکیلچیسی علاوه ائتمکله دوزه لیر. مثال: برکدن- یاواشدان- دریندن- تئزدن..

٢- بعضی ساده طرزی حرکت ظرفلرینه "ینه" شکیلچیسی آرتیرماقلا دوزه لیر. مثلا: ترسینه- دوزونه- دیکینه- چپینه..

٣- اسملره "لا- له" شکیلچیسی علاوه ائتمکله دوزه لیر. مثال: شدتله- عظمتله- سرعتله- مهارتله- باجاریقلا..

٤- عرب دیلیندن آلینما کلمه لره "آن- ه ن" شکیلچیلری آرتیرماقلا دوزه لیر. بو شکیلچیلر عرب دیلیندن آلینمادیر. مثال: قلبا- سهوا- بعضا..

۵- اسملره "جاسینا- جه سینه" شکیلچیلری علاوه ائتمکله دوزه لیر. مثلا: قهرمانجاسینا- آلچاقجاسینا..

۴- "جا- جه" شکیلچیلریله دوزه لن طرزی حرکت ظرفلری. مثلا: یاخشی جا- یاواشجا- ساکتجه- آچیق جا..

۷- "آکی- ه کی" شکیلچیلریله دوزه لنلر. مثلا: یاناکی- چپه کی- زوراکی...

٨- فغل کؤکلرینه "یق- ایک- جاق- جک- ماز- مه ز" شکیلچیلری علاوه ائتمکله دوزه لنلر. مثلا: آچیق- آییق- تله سیک- اوتانجاق- سئوینجک- دینمز...

مرکب طرزی حرکت ظرفلری

ایکی کؤک سؤزدن دوزه لن و ایشین اجرا طرزینی بیلدیرن ظرفلره مرکب طرزی حرکت ظرفلری دئییلیر.بونلارین چوخ ایشلنن نوعلری بونلاردیر.

١- بیر ساده اسم، صفت، سای و یا طرزی حرکتظرفینین تکراریندان عمله گلیر کی، اونلارین آراسیندا تیره (-) قویولور. مثلا: یاواش- یاواش، تئز- تئز، حرصلی-حرصلی، دامجی- دامجی..

فعل کؤکلرینه "آ- ه" آرتیراراق تکرار اولونانلار دا بو قبیلدندیر. مثلا: قاچا- قاچا، گوله گوله..

٢- تکرار اولونان کلمه لرین آراسیندا "با- به" آرتیرماقلا دوزه لنلر. مثلا: دالبادال، یانبایان، تکبه تک..

٣- "بیر" سؤزونون واسطه سیله دوزه لنلر. مثال: بیردن بیره، بیرجور...

٤- مختلف حاللاردا اولان ایکی اسمدنن دوزه لنلر. مثال: ال- اله- قول-قولا- چییین چییینه- اوزو اوسته- اؤز باشینا....