باغلاییجیلار

باغلاییجیلارین مستقیل معناسی اولمور و اونلارین ایکی اساس وظیفه سی وار:

١- جمله نین ایکی همجنس عضوونو بیری- بیرینه باغلار. مثلا: "ائلناز و علی مکتبه گئتدیلر" جمله سینده "ائلناز و علی" هر ایکیسی جمله نین مبتداسیدیر، همجنس عضوودور و "و" باغلاییجیسی اونلاری بیری-بیرینه باغلانمیشدیر.

٢- بیر جمله نین ایکی قسمتینی بیری-بیرینه باغلار. مثلا: "من سنه دئدیم کی، آنا دیلینی اؤیرن" جمله سینده ایکی فکر وار، بیری "من سنه دئدیم" ایکینجیسی "آنا دیلینی اؤرن" ، "کی" باغلاییجیسی بو ایکی قسمتی بیری- بیرینه باغلامیشدیر.

بو سببلره گؤره بو کلمه لره "باغلاییجی" آدی وئریلمیشدیر. دئمک ایکی همجنس کلمه نی و یا بیر جمله نین ایکی قسمتینی بیری-بیرینه باغلایان کلمه لره باغلاییجی دئییلیر.

باغلاییجیلارین قورولوشجا نوعلری

باغلاییجیلار قورولوشجا ایکی جور اولور:

١- ساده باغلاییجیلار: ساده باغلاییجیلار یالنیز بیر سؤزدن عبارت اولور. مثال: و- هم- کی- گاه- اما- لاکن- آنجاق- اگر- دا- ده -تا- ایسه- گویا- یعنی- حتی..

مرکب باغلاییجیلار: بو باغلاییجیلار ایکی و یا اوچ سؤزدن عمله گلیر. بونلارین مهملری بونلاردیر: چونکی- یاخود- هر گاه- هر چند- نه اینکی- یوخسا- هابئله- اونا گؤره- بونا گؤره- سانکی- گویا کی- تا کی- ائله کی- اودور کی- بونا گؤره- بونون اوچون- اونا گؤره ده- همده- یادا کی- همده کی- و یاخود- اگر چی..

باغلاییجیلارین بیر قسمی اینکار آنلامی داشیییر. بونلارین چوخ ایشلننلری بونلاردیر: نه- نه ده- و نه- ونه ده- نه ده-نه ده کی...

بو باغلاییجیلارین ایشلنمه سینه بیر مثال: بابک نه آنا دیلینی آتار، نه ده، وطنینی ترک ائدر. بعضی باغلاییجیلاردان سونرا وئرگول(،) یازیلیر.